Быйыл өрөспүүбүлүкэҕэ хаарбах дьиэттэн дьону көһөрөр бырагыраамаҕа 31 млрд. солк. үп тиийбэккэ Дьокуускай 17 кыбаарталын олохтоохторо иҥнэри-хаҥнары түспүт, сиргэ тимирэн эрэр самнархай дьиэлэригэр салгыы олороллоругар тиийэллэр. Кырдьаҕас өттө хаһан саҥа таас дьиэҕэ көһөрүн кэтэһэ сатаан баран бааннаҕа сууммакка анараа дойдуга аттанна, кинилэр оҕолоро да сааһырдылар...
Бу нэдиэлэҕэ Ил Түмэҥҥэ 2019-2025 сс. хаарбах дьиэттэн дьону көһөрүү өрөспүүбүлүкэтээҕи бырагыраама хайдах туолан иһэрин иһитиннэрэр бырабыыталыстыба чааһыгар СӨ Тутууга миниистирэ Виктор Романов дьиэ-уот кодексатыгар, федеральнай сокуоҥҥа саҥа киириэхтээх уларыйыылар туһунан билиһиннэрдэ.
Хаарбах дьиэттэн дьону көһөрөргө 2025 с. «Дьиэ-уот уонна куорат эйгэтэ» диэн национальнай бырайыак оннугар «Олох инфраструктурата» диэн саҥа национальнай бырайыак киириэхтээх. Бу бырайыакка кэккэ уларытыылары киллэриэхтэрин баҕараллар.
Бүддьүөккэ үп-харчы тиийбэтиттэн сылтаан инникитин хаарбах дьиэттэн дьону көһөрөргө Арассыыйа Тутууга министиэристибэтэ дьиэ-уот кодексатыгар тосту уларытыылары киллэрэр туһунан федеральнай сокуон барылын бэлэмнээбит.
Өскөтүн дьиэ-уот кодексатыгар уларытыылары ылыннахтарына, дьиэни бас билээччи хаарбах уонна саҥа таас дьиэ сыанатын араастаһыытын булгуччу төлүөхтээх.
Быһа холоон, ааҕан көрдөххө, 1 хостоох хаарбах дьиэ сыаната 1,5-2 мөл. солк., оттон саҥа тутуллубут дьиэҕэ 1 хостоох кыбартыыра 5,5 -7,5 мөл. солк. оччотугар олохтоохтор 3,5-5,5 мөл. солк. төлүөхтэрин наада. Самнархай мас дьиэҕэ олорор дьон, биллэн турар, итиччэ харчыны ууран биэрэр, ипэтиэкэни да төлүүр кыахтара суох.
Маннык кытаанах сокуон олоххо киирдэҕинэ, хаарбах дьиэттэн көһөөччүлэри босхо дьиэнэн хааччыйыы аны тохтотуллуон сөп. Оттон инникитин бас билиигэ көһөрөргө социальнай куортам дуогабарынан дьиэни биэрэри эмиэ тохтоторго диэн дьиэ-уот кодексатыгар уларытыылары киллэрэргэ сокуон барыла оҥоһуллубут. Хаарбах дьиэттэн көһөр дьону саҥа дьиэни-уоту бас билэр бырааба суох уһун кэмнээх куортамҥа олордуохтарын баҕараллар.
Өскөтүн Судаарыстыбаннай Дуума дьокутааттара дьиэ-уот кодексатыгар үөһэ этиллибит уларытыылары киллэрэр сокуон барылын ылыннахтарына, олохтоохтор хаарбах дьиэттэн көһөргө уһун кэмнээх куортамҥа олоруохтара, эбэтэр ипэтиэкэни төлүүргэ күһэллиэхтэрэ. Дьон үйэлэрин тухары дьиэлэрин бас билиигэ кыайан көһөрбөккө куортамнаан олоруохтара.
Бырагыраамаҕа эрдэ киирбит дьон босхо дьиэлэннилэр, оттон үп тиийбэккэ хойутаабыттар бэйэлэрин хармааннарыттан төлүөхтэрэ. Маннык тэҥэ суох сыһыан киһи быраабын кэһии курдук өйдөнөр.
Миниистир Виктор Романов хаарбах дьиэттэн дьону көһөрүүгэ субъектартан элбэх этии киирбитин, ону учуоттаан туран, уларытыылары син биир ылыналларын туһунан эттэ.
Хаарбах дьиэҕэ кыаммат араҥа олорор
Сүрүн дакылааччыты истэн баран норуот дьокутааттара ыйытыктары биэрдилэр. Антонина Григорьева дьиэ сыаната үрдүү турарын хайдах тохтотуохха сөбүн, тыа сиригэр, Аартыкаҕа дьону олохсутарга төһө дьиэ тутулларын ыйыталаста, оттон харчынан бэриллэр толуйуу дьиэ атыылаһарга эппиэттэһэр буолуохтааҕын бэлиэтээтэ.
Алена Атласова ити этиллибит уларытыылары ылынарга эргэрбит самнархай мас дьиэҕэ кыаммат, социальнай өттүнэн көмүскэлэ суох нэһилиэнньэ олорорун, кинилэр интэриэстэрэ төһө учуоттаммытын сураста.
Тутуу миниистирэ Виктор Романов дьиэни урут босхо биэрэллэрэ, оттон билигин төлөбүрдээх оҥороллоро дьиҥэ сөбө суоҕун, бырагыраама бүддьүөттэн үбүлэниэхтээҕин туһунан федеральнай кииҥҥэ сурук ыыппыттарын туһунан эттэ.
Саҥа национальнай бырайыак ылыныллыбытын кэнниттэн өрөспүүбүлүкэтээҕи бырагыраама оҥоһуллуоҕа, онно үп тиийбэккэ көһөрүллүбэккэ хаалбыт дьон киириэхтэрэ уонна 2017 с. тохсунньу 1 күнүттэн 2022 с. тохсунньу 1 күнүгэр диэри саахалланар туруктаах дьиэлэр хабыллыахтара.
2025-2030 сс. диэри үлэлиэхтээх «Олох инфраструктурата» саҥа национальнай бырайыак чэрчитинэн 465,83 тыһ. кв.м. иэннээх хаарбах дьиэттэн 25,91 тыһ. киһини көһөрүөхтээхтэр. Ону үбүлүүргэ барыллаан ааҕыынан 56,6 млрд. солк. көрүллүөхтээх, онтон федеральнай пуонда үбүттэн 35,8 млрд. солк. киириэхтээх, өрөспүүбүлүкэ 20,8 млрд. солк. угуохтаах.
Маны таһынан, билиҥҥи бырагыраамаҕа 31 млрд. солк. үп дэписиитэ баар. Бачча элбэх харчыны Саха Сирин бүддьүөтэ уйунар кыаҕа суох. Онон кыттыгас үбүлээһин өлүүтүн кыччатар туһунан Ил Дархан Айсен Николаев РФ Бырабыыталыстыбатын вице-премьерын Марат Хуснуллины кытта салгыы дьүүллэһиэхтээх.
Хаартыска: https://www.infotimes.ru/news/proshloe-nastoyashchee-i-budushchee-17-go-kvartala-yakutska-istorii-starozhilov-i-novyy-oblik-mikror/
-
0
-
0
-
0
-
6
-
4
-
20
