Төгүрүк сыл үлэлиир аан дойду таһымнаах дьиэ кэргэн куруордун, саҥа куораты тутарга 457,9 млрд. солк. тахса үбү угуохтара, 100 тахса гостиница дьэндэйэн тахсыаҕа. 14 000 тахса үлэ миэстэтэ тэриллиэхтээх. Бастакы туристар манна 2030 с. сынньана кэлэр кыахтаныахтара. Саҥа куораты чугастааҕы Крым күргэтин нөҥүө тумул арыыны кытта ситимниэхтэрэ.
17 км. уһуннаах кумах пляжка муора кытылыгар үрүҥ баарыс курдук халлааҥҥа харбыаласпыт отеллар быыстарыгар араас аттракционнары, искибиэрдэри, пааркалары, доруобуйаны чэбдигирдэр, бальнеологическай кииннэри, уу успуордун оскуолатын тутуохтара. Египет, Турция отелларыттан итэҕэһэ суох саҥа куораты тутарга, Сочи олимпийскай эбийиэктэрин тутууларынааҕыттан ордук үбү угуохтаахтар. Сыл ахсын омук сиригэр сынньана барар дьон манна кэлэн, миллиардынан үп Арассыыйа иһигэр хааларын ситиһэргэ улахан үлэ ыытыллыахтаах.
Мега куруорт «Туризм уонна ыалдьытымсах буолуу индустрията» диэн национальнай бырайыак чэрчитинэн тутуллар. Бэрэсидьиэн Владимир Путин сорудаҕынан федеральнай бырайыак оҥоһуллан, төгүрүк сыл үлэлиир «Биэс муора уонна Байкал эбэ» диэн куруортар тэриллиэхтээхтэр. Онон Анаапаҕа дьиэ-уот сыаната ыарыыр чинчилээх.
«Саха дьоно үрдүк биэнсийэҕэ тахсаары дойдуларыгар хойукка диэри үлэлии сатыыллар, оттон хамнаһы тэҥнээн көрдөххө, Дьокуускайга түспүт, манна үрдээбит курдук. Тэрилтэ аайы үлэһит тиийбэт, атыыһыттар 85-95 000 солк. ылаллар, администратор киэнэ өссө үрдүк», — диэн этэр Настя.
Анаапаҕа кэтэх дьиэлэр кыбартыыраттан быдан сыаналаахтар, 15 мөл. солк. саҕаланаллар, муораттан тэйэн истэх аайы, сыана чэпчиир, станицаҕа 80 кв. м. иэннээх биир этээстээх дьиэни 7,5 мөл. солк. булуохха сөп.
Сорох дьон үптэрин уган баран эбии дохуот ылаллар, холобур, Анаапаҕа түөрт сулустаах бэлэм отельга 30 кв.м. иэннээх хоһу 10 мөл. солк. атыылаһан баран ону куортамнаан, эбии дохуот киллэринэллэр. Биллэн турар, кыра хамнастаах, бастакы усунуоһу төлүүр харчылара суох дьон улахан суумалаах ипэтиэкэҕэ киирэн туран итинник инвестициянан дьарыктаналлара сэрэхтээх.
Хаартыска: https://www.kommersant.ru/doc/5938345 + Анастасия Тиманани архыыбыттан.
-
1
-
0
-
0
-
0
-
0
-
0
