Уопсастыба

Арсен Томскай тус оруола

Настя СГУ юридическай факультетын бүтэрэн баран «ЭПЛ-Даймоҥҥа», Москубаҕа «Уралсиб», «Ташир бөлөххө», Арсен Томскай «Синет» хампаанньатыгар үлэлээбитэ. Дойду киин куоратыгар улахан корпорацияларга уопутурбут киһи үлэтин бэрт түргэнник үмүрүтэн кэбиһэрэ. Биирдэ чуҥкуйа олорорун көрөн, Арсен Томскай дьиэ-уот атыытынан дьарыктанарга эбии сорудах биэрбитэ.  

Ааҕыныстыбаны арыйан баран куйаар ситимигэр көһөрөр былаан баара даҕаны, «Синет» салайааччыта Настя бэйэтэ туһунан тэрилтэ арыйан үлэлииригэр, эбэтэр киниэхэ юриһынан хааларыгар сүбэлээбитэ. Кыыс ийэтин кытта сүбэлэһэн баран урбаан суолугар бэйэтэ ыллык арыйан, бастакы хардыыларын оҥорорго санаммыта. Арсен икки коттедж дьиэни атыылыырга 3D туурдаах сайаапка биэрбитэ, кэлэктиип толкуйдаабыт «Панорама» дьиэ-уот ааҕыныстыбатын аата уонна логотиба бэлэх быһыытынан хаалбыта. Ити курдук 2012 с. хамсаабат баай-дуол ырыынагар ааҕыныстыба арыйан, урбаанньыт быһыытынан үлэтин саҕалаабыта.

Эдэр кыыс итинник бэйэтин бэйэтэ хааччынар, төлөнөр уоппуската, больничнайа суох көҥүл үлэҕэ барбыта бэйэтигэр эрэллээҕин, күүстээх санаалааҕын туоһулуур. Оччолорго Укт.ру «Дневники» урбааны хайдах саҕалаабытын туһунан суруйууларын дьон сэргээн, «Панорама» киэҥ эйгэҕэ биллэн, сакаас киирэрэ элбээн барбыта. Суруналыыстарга дьиэ-уот ырыынагын ырытыыны, анаарыыны бэлэмнээн биэрэн, Анастасия Тиманани бу эйгэҕэ эспиэр быһыытынан биллибитэ. Тэлэбиидэнньэҕэ ыҥырыллан, сурунаалларга, хаһыаттарга тахсан,  рекламаҕа харчыны укпакка,  тэрилтэтин атаҕар туруорбута.

Урбааҥҥа уһуйааччы быһыытыынан Настя «ЭПЛ-Даймонд» бастакы салайааччытыгар Петр Федоровка, кини киэҥник толкуйдуу үөрэппитигэр  махтанар.

“Саха бирилийээннэрэ аан дойду таһымыгар тахсан, бар дьон сүрэҕин сүүйүөхтэрин баҕарабын», — диирин оҕотук санаабар олоххо хайдах эрэ киириэ суох амбициознай соругу туруорар дии саныырым. Мин кини тылларын олоҕум тухары өйдөөн хаалбыппын. «ЭПЛ-Даймоҥҥа» баара-суоҕа икки сыл үлэлээт, Дириэктэрдэр сүбэлэригэр киирбитим, мин визам суох биир да улахан докумуоҥҥа илии баттаабат этилэр.

Кэлин кэтээн көрдөххө, «ЭПЛ-Даймонд» Арассыыйа үгүс куораттарыгар, СНГ дойдуларыгар, оннооҕор Европаҕа, Эмиэрикэҕэ кытта маҕаһыыннардаах. Онон киэҥник толкуйдуур киһи элбэҕи ситиһэр эбит диэн өйдөөбүтүм», — диэн кини санаатын үллэстэр.

350 мөл. солк. сделка

Саҥа тутулла турар эбийиэктэри уонна иккис ырыынак дьиэлэрин атыылаан баран улахан сыаналаах кэммиэрчэскэй дьиэ-уот, офис атыытын ылсыбыта. «Республика» дьыалабыай киин саҥа үлэҕэ киирэригэр риэлтор үлэтин харчынан буолбакка, офистар хосторунан төлөһөллөрө, ону куортамҥа биэрэн баран кэлин сыана ыараабытын кэннэ бүк атыылаабыта. «Европа» түүҥҥү кулуубу Саха Өрөспүүбүлүкэтин Бырабыыталыстыбатыгар 350 мөл. солк. атыылаабытын кэнниттэн Эстрада тыйаатырыгар биэрбиттэрэ.

Настя тоһуттар тымныылаах кырыа кыһыны сөбүлээбэт буолан, түөрт сыл тухары соҕуруу муора кытылыгар Таилаҥҥа баран кыстыыра. Урукку кэргэнин кытта биир рюкзактаах мотикка олорон, аан дойдуну кэрийэллэрэ. Оҕолонон баран эмиий үүтүнэн аһыыр кырачааны кытта салгыы оннук сылдьыахтарын туттуна санаабыттара.

Ол кэмҥэ кэргэнин ийэтэ Сангаартан Краснодарскай кыраай  Кубаньнаа5ы Славянскай и кыра куоратыгар көһөн барбыта. Биэс ыйдаах кыыстарын эбэтигэр хаалларан баран Индия Гоа куруортугар уонча хонукка барбыттара. Эбэлэрэ кырачаан сиэнин ыарырҕаппакка этэҥҥэ көрөн, тургутугу ааһан, эдэр төрөппүттэр оҕолорун хаалларан баран массыынаны куортамнаан, Сочига, Крымҥа баран хаалаллара. Сылга хаста даҕаны эбэлэригэр Дьокуускайтан кэлэр-барар ырааҕын, уустугун иһин, оҕону көрөр  киһилэригэр чугаһаан, биэс сыл анараа өттүгэр манна көһөн кэлэн, дьиэ туттубуттара.

Урукку кэргэнэ дьиэ тутуутунан дьарыктаммыта, Настя докумуонун оҥорон, дьиэни өрөмүөннээн, ис-тас көрүҥүн тупсаран, атыыга таһаарара. 1990-ус сылларга тутуллубут эргэ дьиэлэри атыылаһан баран саҥардан биэрэн, кырыыһатын, түннүгүн, муостатын барытын олоччу уларытан, сыанатын эбэн атыылыыллара.

«38 сааспар биэнсийэҕэ таҕыстым»

«Краснодарскай кыраайга, Дьокуускайы кытта тэҥнээтэххэ, риэлтор төлөбүрэ быдан үрдүк, килийиэннэрим бары биир дойдулаахтарым кэлэллэр, кэлэптиипкэ араас куораттарынан 4-5 киһи үлэлиир. Социальнай ситиммэр 38 сааспар биэнсийэҕэ таҕыстым, муора кытылыгар сынньалаҥ олоххо бардым диэн суруйбутум. Хас да эбийиэги атыылаһан, куортамҥа биэрбитим, онтон дохуот киирэ турар. Үлэлээбэккэ аан дойдуну кэрийэ сылдьан, дьиҥэр, блогердыыр санаалаах кэлбитим.

 Кубаньнаа5ы Славянскайга Европаҕа саамай улахан саад баар, ол туһунан киинэ устуохпун баҕарарым даҕаны, 2020 с. хамсык дьаҥа өрө туран, муораҕа, сибиэһэй салгыҥҥа тардыһар дьон ахсаана элбээбитэ. Албыҥҥа олордор түөкүттэртэн куттанан, биир дойдулаахтарым дьиэ атыылаһарга көмөлөс диэн суруйаллара. Дьокуускайга 8 сыл дьиэ-уот ааҕыныстыбатыгар үлэлээбит буоламмын, миэхэ эрэнэр киһи үгүс.

Онон саҥа сиргэ «Тиманани-недвижимость» диэн ааҕыныстыба арыйан, сэтинньигэ төрдүс сылбытын туоллубут, билигин Краснодарскай кыраай 12 куораттарыгар дьиэни-уоту атыылыыбыт. Урут кирэдьиит бырыһыана кыра буолан, кэлин оҕоломмут эдэр ыаллар 8-6%, оннооҕор 0,1% ипэтиэкэ ылбыттара», — диэн кэпсиир Настя.

Билигин 7 сааһыгар диэри кыра оҕолоох ыаллар, ону таһынан Краснодартан чугас Майкопка, Адыгея өрөспүүбүлүкэтигэр 18 сааһыгар диэри икки оҕолоох дьиэ кэргэн 6-4 %наах ипэтиэкэнэн туһанар кыахтаахтар. Хара муора кытылыгар күн бүгүн саамай чэпчэки сыанаҕа Новороссийскай куоракка саҥа тутулла турар дьиэҕэ устуудьуйаны 4,3 мөл. солк., 1 хостооҕу 6 мөл. солк. атыылыыллар. Ону таһынан, улахан дохуоттаах дьоҥҥо кэлин, уһатан төлөһөргө көрүллэр. Бэлиитикэ сарсын хайа диэки хайыһара биллибэт буолан, Крымҥа, Абхазияҕа, Хотугу Кипрга дьиэ-уот атыытынан дьарыктамматтар. Урут дьон Европаҕа массыынанан тахсаары Калининградка дьиэ атыылаһар этилэр, сааҥсыйа кэмигэр кыраныысса сабыллан, арҕаа дойдулары кэрийэр кыахтара суох, ол иһин дьиэ-уот сыаната кыралаан түһэн эрэр.

Хаартыска: Анастасия Тиманани архыыбыттан.