40-чалаах дьон уоппускаларыгар кэлэн сынньанан бараллар уонна олорбот кэмнэригэр куортамныыллар. Биэнсийэҕэ тахсыахтарыгар диэри дьиэлэрэ кэтэһэн турар, ипэтиэкэлэрэ да сабыллар, эбии дохуот да киирэр. Риэлтор этэринэн, биир хостоох кыбартыыраны өр кэмҥэ 30 000 солк. куортамныыллар. Ааҕыныстыбалар дьиэни сууйаллар-сотоллор, дьону булан биирдии суукканан куортамҥа биэрэллэр, кинилэргэ дохуот 30% төлүүллэр.
Кэлиҥҥи кэмҥэ элбэх саха дьоно дьиэ атыылаһан, көһөн кэллилэр, Краснодар, Сочи, Анаапа бассаап бөлөхтөрүгэр 100-150 киһи баар. Кинилэр түмсэн ыһыахтыыллар, бэйэ-бэйэлэригэр көмөлөсүһэн биир иллээх дьиэ кэргэн курдук олороллор.
Аҕыйах сыллааҕыта эдэр дьон Турцияҕа олохсуйа барарга, дьиэ атыылаһарга юрист киһи быһыытынан Анастасия докумуонун сөпкө толорорго көмөлөһөрүгэр көрдөспүттэрэ. Кини дойду куораттарын үөрэтэн баран Средиземнэй муора кытылыгар Алания анараа өттүгэр турар Мерсин куораты сэргээбитэ. Манна элбэх турист мустубат, ол иһин муората ыраас, оттон Анталияттан сыаната икки төгүл чэпчэки.
«Омук сиригэр дьиэ атыылаһарга дуоллар куурсуттан улахан тутулуктаах, икки сыллааҕыта дуоллар 60 солк. эрдэҕинэ 40 кв.м. иэннээх 1+1 хостоох кыбартыыраны 5 мөл. солк. ылыахха сөп этэ. Аны Турцияҕа дьиэни өрөмүөннээн баран бэлэми туттараллар. Билигин дуоллар 100 солк. тиийбитин кэннэ 1+1 хостоох кыбартыыраны саамай намтаабыта 10 мөл. солк. атыылыыллар. Онон сыана Анаапаны кытта тэҥнэстэ.
Турцияҕа олохсуйарга урут 75 000 евро, билигин 200 000 евро төлөөн (20 мөл. солк. сыаналаах дьиэни атыыластаххына) биирдэ көҥүл биэрэллэр. Ол иһин үгүс киһи барарга күһэлиннэ, биирдии сылынан куортамнаан олорор дьоҥҥо ВНЖ биэрбэттэр. Инфляция даҕаны сыл ахсын үрдээн, сыана эмискэ ыараата. Эрдэ дьиэ атыыласпыт дьон бэйэлэрин бас билиилэригэр көһөрөн олохсуйа хааллылар.
Грузияҕа Батумига кыбартыыра сыаната чэпчэки этэ даҕаны, кэлин тута ыараата. Таилаҥҥа барар дьон эмиэ бааллар, ол эрэн кэлии киһи манна дьиэни бас билиигэ докумуонун кыайан оҥотторбот, өр кэмҥэ куортамныахха эрэ сөп. Хотугу Кипрга дьиэ-уот сыаната чэпчэки эрээри, Абхазия курдук бу дойду быраап өттүнэн билиниллибэккэ турар. Уонча сыл анараа өттүгэр Болгарияҕа бэлэм өрөмүөннээх дьиэни 1-2 мөл. солк. ылыахха сөп этэ, оттон Дьокуускайга 1 хостоох кыбартыыра 2,5 мөл. солк. сыаналааҕа», — диэн кэпсиир.
Онон сыана ыарыан иннинэ эрдэ дьиэ-уот ылбыт дьон билигин үөрэ-көтө олордохторо, оттон өр толкуйдуур-сыымайдыыр, олоҕун уларытартан куттанар, саҥаттан сэрэнэр, бытаан, кэнэн киһи кэмсинэн эрдэҕэ. Хамсаабат баай-дуол ырыынага, урбаан түргэн-тарҕан быһаарыныылаах, хорсун дьону сөбүлүүр.
Хаартыска: Анастасия Тиманани архыыбыттан.
-
0
-
0
-
0
-
0
-
0
-
0
