Ол туһунан туризм сайдыытыгар ыытыллар судаарыстыбаннай бэлиитикэни дьүүллэһэр Ил Түмэн парламентскай истиитигэр урбааҥҥа уонна туризмҥа сис кэмитиэт бэрэссэдээтэлэ Алексей Корнилов иһитиннэрдэ.
Күн бүгүн сөмөлүөт билиэтэ ыарахана, аныгы олоххо эппиэттиир гостиница, суол-иис, сиэрбис суоҕа туризм сайдыытын атахтыыр. Онон атын эрэгийиэннэртэн кэлэр дьону сынньатарга, айылҕабыт кэрэтин көрдөрөргө улахан үлэ ыытыллыахтаах.
Турист кэлиитинэн Приморскай кыраай Уһук Илин бастакы миэстэни ылар, Саха Сирэ кэнники хаалан иһэр, 2023 с. уокурукка 6,3 мөл. киһи сынньаммыт, онтон өрөспүүбүлүкэҕэ турист 4% тиксэр. Бурятия, Хабаровскай кыраай, Сахалин, Камчатка биһигини таһыччы куотан иһэллэр.
Өрөспүүбүлүкэ иһигэр 2024 с. турист кэлиитинэн бастакы миэстэни Нерюнгри оройуона ылар, онтон Дьокуускай, Ленскэй, Мииринэй тилэх баттаһаллар.
Туризмҥа — миллиардынан үп
Саха Өрөспүүбүлүкэтин урбааҥҥа, атыыга-эргиэҥҥэ уонна туризмҥа миниистирэ Тимур Ханды туризмтан киирэр үп экэниэмикэни хайдах сайыннарыан сөбүн, стратегия тосхоллорун туһунан билиһиннэрдэ.
Росстат дааннайынан, 2023 с. өрөспүүбүлүкэҕэ 1,7 млрд. солк. суумалаах туристическай өҥө оҥоһуллубут, итиниэхэ гостиницалар, уопсастыбаннай аһылык, сөмөлүөт билиэтэ, култуурунай тэрээһиннэр, төлөбүрдээх аралдьыйыы барыта киирэр. 2024 с. 11 ыйыгар Арассыыйа үрдүнэн туристар бу салааҕа баан каартатынан 3,7 млрд. солк. бараабыттар. Атын бааннары аахтахха, туризмҥа 11 млрд. солк. үп киирбит.
Дьон омук сиригэр соҕуруу бара сатаабакка, дойдутугар сынньанан, итиччэ үлүгэрдээх харчы Саха Сиригэр хааларын ситиһэргэ, ону таһынан, өрөспүүбүлүкэ тас өттүттэн туристары ыҥырарга стратегия оҥоһуллубут. Онно сурулларынан, айылҕаны кытта алтыһарга экологическай, экстремальнай туризм сайдыахтаах, түүлээҕи, адьырҕа кыылы бултата, эмис эттээх балыгы балыктата, хоту дьүкээбил уотун көрдөрө илдьиэхтээхтэр.
Аныгы олоххо сүөгэй хайдах оҥоһулларын билбэт, ынаҕы көрө илик куорат оҕото үгүс. Ол иһин этнокултуурунай туризм чэрчитинэн тыа сиригэр ынаҕы-сүөһүнү иитэн олорор сис ыал уһаайбаларын, хаһаайыстыбаларын көрдөрүөхтэрэ. Ону таһынан, дьыалабыай, круизнай, гастрономическай, автомобильнай туризм сайдыахтаах.
Василий Кононов хаартыскаҕа түһэриитэ.
Сиһилии "Ил Түмэн" хаһыат кэлэр нүөмэригэр ааҕыҥ.
-
0
-
0
-
0
-
0
-
0
-
0
