Саха Өрөспүүбүлүкэтин урбааҥҥа, атыыга-эргиэҥҥэ уонна туризмҥа миниистирэ Тимур Ханды этэринэн, 2025 с. Саха Сирин туһунан имиджевай видеороликтары устан саҕалыахтара. “Уһук Илин — мүлчүргэннээх сырыы сирэ” диэн куонкуруска баҕалаах дьон 8 мүн. диэри уһуннаах видеоролик устан ыытыахтаахтар, кыайбыт киһи 3 мөл. солк. наҕараадаланар.
Дьон сибиэһэй салгыҥҥа тахсан хаамарын туһугар сатыы киһиэхэ анаммыт уонча суол оҥоһуллуоҕа, ол иһигэр куорат эргин, итиэннэ туристическай акселераторы тэрийиэхтээхтэр, мүлчүргэннээх сырыылаах туризм федеральнай пуорума ыытыллыахтаах, Москубаҕа саха аһын ресторана аһыллыахтаах.
Оттон омук туристарын ыҥырарга Discover Russia национальнай бренды кытта бииргэ үлэлэһиэхтээхтэр. Омук тылын билэр гидтары үөрэтэн, туристическай өҥөлөрү тас дойдулар ырыынактарыгар таһаарыахтаахтар. Араас сонун тэрээһиннэри толкуйдаан, омук дьонун болҕомтотун тардарга үлэ барыахтаах.
Өрөспүүбүлүкэ иһигэр олохтоохтор атын улуустарга сынньана баралларын ситиһэргэ эрэгийиэннээҕи кэшбек киириэн сөп. «Саха Сирэ 36» диэн челлендж биллэриллэн, 36 улууһу барытын кэрийэргэ күрэхтэһэн, дьон саҥаттан саҥа улууска айанныы, уоппускаларыгар бара-кэлэ үөрэниэхтээхтэр.
Миниистир Тимур Ханды инникитин Саха Сиригэр ыалдьытымсах буолуу сылын тэрийэргэ этии кииллэрдэ. Оччотугар туризм салаатыгар үлэлиир урбаанньыттарга тустаах көмө оҥоһуллуоҕа, араас сэминээрдэри тэрийэн, үлэһиттэри үөрэтиэхтэрэ, бэлэмниэхтэрэ.
Туризмы сайыннарар, 2030 с. диэри үлэлиир стратегия олоххо киирдэҕинэ, гостиницалар нүөмэрдэрэ 4500 киһиэхэ диэри элбиэҕэ, 4* итэҕэһэ суох үрдүк таһымнаах отельга 600 хос аһыллыаҕа. Эрэгийиэн туристическай индустриятын сайыннарарга 30 сиэрбиһи биир онлайн-платформаҕа түмүөхтэрэ. Саха Сирин алмааһын, көмүһүн көрүөн баҕалаах дьон үгүс, ол иһин бырамыысыланнай туризмы сайыннаран, 10 хайысханы оҥоруохтара.
Хаартыска: https://yakutia.info/article/202154
-
0
-
0
-
0
-
0
-
0
-
0
