Азия соҕуруулуу-илиҥҥи эҥээригэр киэҥник биллэр бэстибээлгэ 75 дойдуттан уопсайа 220 киинэ кыттыбыт, ол иһигэр Арассыыйаттан 20-тэн тахса киинэ туруоруллубут.
«Кыталыктаах кырдалым» киинэни талааннаах режиссер Михаил Лукачевскай үс сыллааҕыта уһулбута. Киинэ 2024 сыл муус устар ыйга улахан экраҥҥа тахсан, бэйэтин аатын дорҕоонноохтук ааттаппыта. Ааспыт сыл муус устарыттан саҕалаан, киинэ Арассыыйатааҕы уонна норуоттар икки ардыларынааҕы киинэ бэстибээллэригэр улахан бириэмийэлэринэн бэлиэтэммитэ. Ол курдук «Черноречье Фест» арассыыйатааҕы киинэ бэстибээлигэр, XVII норуоттар икки ардыларынааҕы «Евразия» киинэ бэстибээлигэр, Анаадырга ыытыллыбыт VIII Аартыкатааҕы норуоттар икки ардыларынааҕы “Золотой ворон” киинэ бэстибээлигэр, Дьокуускайдааҕы VI киинэ бэстибээлигэр гран-при уонна анал бириэмийэлэринэн ааттаммыта. 
I
Киинэҕэ аҕыс саастааҕар ийэтин күн сириттэн сүтэрбит уол туһунан көстөр. Ийэтэ кыталык көтөргө кубулуйбутун туһунан аҕатын кэпсээнигэр итэҕэйэн, уол бу сэдэх көтөрдөр үҥкүүлэрин көрүөн баҕарар. Киинэ биллиилээх уопсастыбанньык, көтөрү үөрэтээччи, айанньыт Иван Дьячковскай -Кыталык Уйбаан олоҕун оҕо сааһын кэрчигиттэн олоҕуран уһуллубута.
Сүрүн оруоллары Амма улууһун Чакыр орто оскуолатын үөрэнээччитэ Миша Слепцов, Саха тыйаатырын артыыската Ньургуйаана Шадрина уонна биллиилээх киинэ артыыһа Ньургун Бэчигэн толороллор.
Хаартыска: nvk-online.ru, YouTube
-
1
-
0
-
0
-
0
-
0
-
0
