Уопсастыба

Оскуола эргэ хаарбах дьиэтэ 1971 с. тутуллубута, ону 2022 с. көтүрбүттэрэ, кэлиҥҥи икки сыл тухары оҕолор үс сиринэн тарҕаһан үөрэнэргэ күһэллибиттэрэ.

Ил Дархан Айсен Николаев үөрэнээччилэри, учууталлары эҕэрдэлээн баран беспилотнай авиационнай ситим кабинетыгар оборудование атыылаһарга сертификат биэрдэ.   

«Бу өр күүтүүлээх эбийиэк олоххо киирдэ. Оскуола саҥа дьиэтигэр оҕолор ис кыахтарын арыйан, үөрэх кыһатын саҥа үктэлгэ таһаарыахтара. Учууталлар төрөөбүт улуустарын, өрөспүүбүлүкэлэрин кэлин аар-саарга аатырдар, суон сураҕын сураҕырдар дьоһун дьону иитэн-үөрэтэн таһаарыахтара диэн эрэнэбин», — диэн кини эҕэрдэ тылы эттэ.

Саха Өрөспүүбүлүкэтин Судаарыстыбаннай Мунньаҕын Бэрэссэдээтэлэ Алексей Еремеев Модут нэһилиэгэ урут-уруккуттан үлэһит дьонунан киэҥ сиргэ биллэрин туһунан бэлиэтээтэ.

«Тыа хаһаайыстыбатын, наука, култуура, судаарыстыбаны салайыы салаатыгар мантан чулуу үлэһиттэр үүнэн-сайдан тахсыбыттара. Максим Кирович Аммосов аатынан биир бастыҥ үлэлээх килбиэннээх сопхуос баар этэ. Урукку өттүгэр социальнай эбийиэк тутуллара тарбахха баттанар буолан, олохтоохтор миэхэ, норуот дьокутаатыгар саҥа таас оскуола хаһан тутулларын туруорсаллара. Бу боппуруоһу  Ил Дархан Айсен Сергеевичка, өрөспүүбүлүкэ бырабыыталыстыбатыгар тиэрдибиппин өйөөннөр, инвестиционнай бырагыраама бырайыагар киллэрбиттэрэ», — диэтэ Алексей Еремеев.

Икки этээстээх саҥа оскуола уопсай иэнэ 2,6 тыһ. кв.м., манна оҕо үөрэнэригэр усулуобуйа барыта тэрилиннэ, үөрэнэр кабинеттар, көмпүүтэр кылааһа, аактабай саала, библиотека, остолобуой бааллар.

«Сорох дьон тыа сиригэр оскуолалар кураанах оҥойон тураллар диэн этэллэр даҕаны, Эҥсиэли хочотугар, Нам улууһугар нэһилиэнньэ ахсаана эбиллэ турар. Урут Нам улууһугар 17 800 киһи олорор этэ, билигин ити сыыппара 30 000 чугаһаан эрэр.

Бу оскуола агропрофильнай хайысхалаах, ол аата выпускниктар түөрүйэни эрэ үөрэтиинэн муҥурдаммакка, олоххо наадалаах билиилээх дьон тахсыахтара.  Экэниэмикэҕэ тыа хаһаайыстыбата сүрүн оруолу ыларын бэлиэтээн туран, тустаах идэлээх дьон билигин олус наадалаахтар. Онон оҕолор төрөөбүт нэһилиэктэрин, улуустарын, өрөспүүбүлүкэлэрин аатын ааттатыахтара диэн эрэнэбин. Ылбыт билиилэрин уопсастыба туһатыгар таһаарыахтара, төрөөбүт дойдуларын сайдыытыгар дьоһун кылааттарын киллэриэхтэрэ», — диэн эбэн эттэ Алексей Ильич.    

Кини оҕолорго үөрэхтэригэр ситиһиилэри, учууталларга айымньылаах үлэни, тулуурдаах буолууну баҕарда.  

Оскуола өрөспүүбүлүкэ инвестиционнай бырагырааматын чэрчитинэн тутулунна, дойду Бэрэсидьиэнэ Владимир Путин көҕүлээбит «Үөрэхтээһин» национальнай бырайыак сыалыгар эппиэттиир. Тутууну олохтоох хампаанньа «Намстрой» ыытта.

Оҕолор саҥа оскуоланы сөбүлээбиттэрин туһунан эттилэр, манна агротехнологическай хайысханан ынаҕы-сүөһүнү иитиигэ, оҕуруот аһын олордууга, массыынаны, тыраахтыры ыытарга үөрэтэллэр. Дуальнай үөрэхтээһин төрөппүттэр сайабылыанньаларынан ыытыллар.

Үөрэнээччилэр 2 разрядтаах иистэнньэҥ, столяр, оҕуруот аһын олордооччу, тиэхиньикэни ыытааччы о.д.а. идэтин баһылыахтарын сөп. Идэ куурсун үөрэнэн бүтэрдэхтэринэ сибидиэтилистибэ бэриллэр.

Санатан эттэххэ, 2018 с. Саха Сиригэр 171 үөрэх кыһата тутулунна, онтон 75 оскуола, 81 оҕо саада. 2025 с. өссө 13 оскуола тутуллан үлэҕэ киириэхтээх.

Хаартыска: Ил Түмэн пресс-сулууспата.