Бэйэтэ да улаханнык тоҥорбокко, саҥа дьылы баттаһа саҥардыы тымныытынан бобута-ыгыта тутуталаан испит халлааммыт аны, отой да кыһыммытын да көрдөрүмээри, биллэримээри гынна диэх курдук күнүн уотунан таммахтарын ыган бардаҕа үһү...
Арҕаа, соҕуруу, киин улуустар, илин эҥэрдэр сааскылыы бардыбыт, халлааммыт сылыйда диэн хаһыс да күннэрин сотовойдарыгар бүппэт сонун буолан субуллан олорор. Куоракка сорох буспуттар бас сыгынньах сүүрэкэлээтилэр, аһары омуннаахтар “куспут кулун тутартан биллэр буолла, ботуруон бүтэн эрэр” диэн булт маҕаһыыныгар ойдулар.
Ол да буоллар, тымныыларынан аатырбыт таас Дьааҥы хайаларын хотооллоругар им-дьим олорор өймөкөөттөр, дьааҥылар күн аайы “биһиэхэ бүгүн сарсыарда -52-54” диэн будулуйбут тымныы туманын быыһынан нэһиилэ кылайан көстөр кыраадыһынньыктарын хаартыскаҕа түһэрэн ыыталлар. Таас Дьааҥылар Сир диэн планетаны атыйахтыы аймыырдыы кэлбит сылыйыыны утары бүтэһик кириэппэс буолан хаар чыпчаалларынан өргөстөнөн, хойуу будулҕан туманнарынан бүрүнэн ыыппаттыы, ымыттыбаттыы соҥуоран турдахтара. Хотооллоругар, хоннохторугар мустубут тымныылар сылаастарынан угаайылаан киирээри быгыалыыр ичигэһи төттөрү үтэйэн эрэллэр. Аргыардаах салгыннара хотугу тыалга олорсон соҕуруу, арҕаа силлиэрдилэр.
Бэлэмнэниҥ, бу кэлбит сылааспыт сарсыҥҥыттан үтүрүллэн, тымныыбыт сыыйа оннун булуохтаах.
Хаартыска: В. Горохов, Дьааҥы, Остуолба
-
2
-
1
-
0
-
0
-
0
-
0
