Биллэрин курдук, баһаар “Теплоэнергосервис” АУо икки этээстээх мас дьиэтиттэн саҕаламмыт. Онно олохтоох дьаһалта, баан, почта салаалара, маҕаһыын, бибилэтиэкэ уонна УФСБ кыраныысса таһынааҕы сулууспата бааллара. Өлбүт, эчэйбит суох.
Баһаар саҕаланыытыгар күүстээх тыалтан уот сыста турар оскуола уонна уһуйаан дьиэтигэр көспүт. Ол түмүгэр таас дьиэ ис өттө бүтүннүү умайбыт. Оскуолаҕа 8 оҕо үөрэнэрэ, уһуйааҥҥа 4 оҕо сылдьаллара биллэр. Усуйаана улууһун баһылыга Валерий Сидорин этэринэн, кинилэргэ билигин табыгастаах усулуобуйаны тэрийэргэ кыһаллаллар. Бүгүҥҥү күннээҕи туругунан буурҕа астыбакка, кыһыҥҥы суолу тэлэн барар кыаллыбат диэн биллэрэллэр.
Билигин бөһүөлэккэ оҕолор үөрэхтэрин тус кыраапыгынан салгыыллар. Бу туһунан үөрэх, наука министиэристибэтэ иһитиннэрэр.
Оскуола умайбытынан сибээстээн, үөрэх министиэристибэтигэр суһал мунньаҕы ыыттылар. Миниистири солбуйааччы С.А. Степанов бэрэссэдээтэллээх оробуочай мунньахха Усуйаана улууһун үөрэххэ управлениетын начаалынньыга А.Р. Дьячковская, «Роспотребнадзор» управлениетын салайааччытын солбуйааччы Н.Б. Борисова уо.д.а. кыттыыны ыллылар.
Мунньах түмүгүнэн, оҕолор тэйиччиттэн олорон, тус кыраапыгынан үөрэнэллэригэр уонна сотору кэминэр үөрэнэр сирдэрин бэлэмнииллэригэр сорудах бэрилиннэ.
Улуус кииниттэн оҕолорго канцелярскай табаардары ыыттылар. Эбии үөрэнэр тэриллэри, учуобунньуктары ыытыахтара. Билигин «Водник» култуура дьиэтигэр оҕолор үөрэнэр сирдэрин бэлэмнииллэр, өрөмүөн үлэтэ барыахтаах. Бу күннэргэ хоту дойдуга күүстээх буурҕа ытыллан, суол-иис мөлтөх.
Хаартыска: "Заря Яны" хаһыат саайта
-
0
-
0
-
0
-
0
-
1
-
0
