Сүрүн героиня Любовь Пахомова, Таптал — орто саастаах кыыс тыа сиригэр олорор, аралдьыйар сирэ үлэтэ эрэ. Кини сааһа ыраатан эрэриттэн, оттон кини кэргэнэ, оҕото суоҕуттан санаарҕыыр. Күн-дьыл дьаалатынан устан иһэр, маннык олордоҕуна олоҕо уларыйыа суох, ол иһин биир үтүө күн үлэтиттэн уурайан, куоракка дьолун көрдүү киирэргэ сананар.
Сыал-сорук туруоруммут киһи баҕа санаатын түргэнник ситиһэр дииллэринии, дьоллоох Дьокуускайга үктэнээт даҕаны, балкуоҥҥа туран электрик Сэмэни кытта билсэр. Кыыспыт аны «икки фроҥҥа» үлэлиир.
Бииртэн биир, кэрэттэн кэрэ кыргыттары кытта күрэс былдьаһан, «Сулумах» телевизионнай бырайыакка кэлбит соҕотох эр киһи, Айаал боҕомтотун ылар туһугар киирсэр. Киһитин собо уҥуоҕар хараарда сыһан, оттон бэйэтэ итии-имэҥнээх испанскай үҥкүүнү толоро сылдьан сыанаҕа иҥнэн охтон, дөйө сыстар даҕаны, кыргыттары барыларын ырааҕынан кэннигэр хаалларар.
Урбаанньыт Айаал кинини талбытын кэннэ, Таптал атын киһини таптыырын өйдүүр, аны ол киһитэ Анаабырга көтүөхтээх. Икки сулумах сүрэхтэр кыайан бииргэ буолаллар дуо? Ол туһунан бу романтичнай кэмиэдийэни көрдөххүтүнэ билиэххит...
«Лена» киинэ тыйаатырыгар буолбут пресс-көрдөрүүгэ айар бөлөх суруналыыстарга киинэни бастакынан көрдөрдө уонна артыыстары хайдах талбыттарын, дьону сынньатар, күннээҕи үлэттэн, түбүктэн аралдьытар киинэни, дьээбэ-хообо сыаналары хайдах устубуттарын туһунан кэпсээтилэр.
«Эр киһи эрээри дьахтар кэмиэдийэтин устарга, сценарийын суруйарга, тылын-өһүн чочуйарга кэрэ аҥаар хараҕынан көрөн режиссер Любовь Борисова көмөлөстө, кинини үгүс көрөөччү билэр. Икки сыл кэриҥэ устубут киинэбитин көрөөччү сыаналыа диэн эрэнэбит, киинэни чэпчэкитик биирдэ көрөн кэбиһэҕин эрээри, аҕыйах мүнүүтэлээх сыананы күнү супту устуохха сөп. Онон каадыр кэннигэр айар бөлөх сыралаах үлэтэ хаалар. Дьону күллэрээри дьээбэ-хообо сыаналары толкуйдуур саамай уустук эбит», — диэн режиссер Валентин Макаров санаатын үллэһиннэ. Санатан эттэххэ, кини бу иннинэ «Дьулуур: мас-рестлинг» киинэни устан киэҥ эйгэҕэ биллибитэ.
Сүрүн героиня Таптал оруолугар Саха тыйаатырын артыыската Татьяна Легантьева уһулунна. Ону таһынан, социальнай ситимнэргэ биллэр блогер, ыытааччы Лиза Газизова Таптал телевизионнай бырайыакка кыайарын туһугар стилистары-визажистары кытта биир улахан хамаанда буолан үлэлээтилэр, дьахтар бэйэтин кэрэ өрүтүн сатаан арыйарыгар кистэлэҥнэрин үллэһиннилэр.
Пресс-көрдөрүүгэ кэлбит суруналыыстар драматичнай ыарахан киинэттэн сылайбыттарын, сандал сааһы көрсө киһини сынньатар, күллэрэр, сэргэхситэр чэпчэки киинэ эмиэ наадатын бэлиэтээтилэр.
Ааптар хаартыскаҕа түһэриитэ.
-
6
-
0
-
0
-
0
-
0
-
0
