Уопсастыба

Николай Александрович Амурскай уобалас Благовещенскай куоратыгар күн сирин көрбүтэ. Белогорскайга олорор эбэлээх эһэтин табаарыстара Аҕа дойдуну көмүскүүр сэрии кыттыылааҕа, байыаннай комиссар эбит. 50 тахса сыл анараа өттүгэр кини аатынан саҥа төрөөбүт сиэннэрин ааттаабыттара, истэригэр ханыы тардан, оҕобут байыаннай буолуо дии санаабыттара уот харахха эппиттии туолбута.

Коля оҕо сааһа хайа быыһыгар, халыҥ тыа ортотугар турар Экимчан эбэҥкилэр бөһүөлэктэригэр ааспыта. Уол улаатан баран Уһук Илиҥҥи байыаннай училищены бүтэрбитэ, онтон салгыы Германияҕа тиийэн 2-ис тааҥкабай аармыйаҕа рота хамандыырынан сулууспалаабыта. 1990-ус сылларга ССРС ыһыллан, уларыта тутуу саҕаланан, Германияттан  тахсыбыттара.

Погоннаах эдэр киһи Ленинградскай уобаласка үлэлээн баран дойдутугар эргиллэн кэлэн, Уһук Илиҥҥи байыаннай академияны бүтэрбитэ. Сахалин арыытыгар пуолка хамандыырынан үлэлии сырыттаҕына үлэһиттэр ахсааннарын сарбыйыы саҕаламмыта. Ыстаап  начаалынньыга Саха Сиригэр байыаннай комиссарынан ананан, Николай Александровиһы солбуйааччынан ыҥырбыта. Онон 2007 с. Дьокуускайга кэлэн, салгыы салайааччыта атын үлэҕэ барбытын кэннэ байыаннай комиссарынан үлэлээбитэ. Бу дойдуну сөбүлээн, биэнсийэҕэ тахсан баран атын сиргэ барбакка олохсуйан олорор.

«Өрөспүүбүлүкэҕэ урут байыаннай комиссариаттарга 200 погоннаах киһи үлэлиирэ, генерал чыына баар этэ, онтон байыаннайдары аҕыйатан барбыттара.

Кинилэр 18 саастарын туолбут уолаттары аармыйаҕа ыытыынан эрэ муҥурдаммакка, ыччаты патриотическай иитиинэн дьарыктаналлар, байыаннай училищеҕа ыыталлар. Байыаннай идэни талан баран бастакы сылларга ноҕоруусканы кыайбакка элбэх уол сыыйыллара, баҕа өттүнэн да бараллара. Кытаанах армейскай эрэсиими киһи барыта тулуйбат.

Атын эрэгийиэннэри кытта тэҥнээтэххэ, өрөспүүбүлүкэҕэ байыаннай учуокка саппааска турар дьон ахсаана олох аҕыйах этэ. Онтон билигин Анал байыаннай дьайыы буойуннарыттан хас да киһиэхэ Арассыыйа дьоруойа үрдүк аатын иҥэрдилэр», — диэн кэпсиир кини.