Быйылгы тэрээһин ытыктыыр киһибит Борис Неустроев – Мандар Уус 80 сааһыгар ананыаҕа. Борис Федорович тимир ууһун быһыытынан биллэрин ааһан, кини дириҥ толкуйдаах этнограф, мыслитель, СӨ тимир уустарын Сойууһун бочуоттаах бэрэссэдээтэлэ, П.А. Ойуунускай аатынан судаарыстыбаннай бириэмийэ лауреата, СӨ Духобунаска академиятын академига, СӨ Бочуоттаах кырасданьыына, Таатта улууһун уонна Баайаҕа нэһилиэгин бочуоттаах олохтооҕо.
Саха Сирин тимир уустарын сүрүн түһүлгэтигэр Кудай Бахсы удьуордарыттан бастыҥнары быһаарыахтара, ол курдук: «Уус-уран оҥоһуулаах быһах», «Дэгиттэр быһах», «Бастыҥ ас быһаҕа», о.д.а. хайысхаларга чулууттан чулуулар биллиэхтэрэ. Оттон бары тургутуулары ситиһиилээхтик ааспыт ууска «Дархан Уус» муҥутуур аата иҥэриллэн, саха бастыҥ ууһунан биллэриллиэҕэ.
Бастыҥнары Сарыал Билюкин, норуоттар икки ардыларынааҕы быыстапкалар хас да төгүллээх кыайыылахтара, Роман Готовцев- Мындыр Уус, СӨ уустарын сойууһун бэрэссэдээтэлэ, Арассыыйа художествотын Академиятын чилиэн-кэрэспэдьиэнэ Дьулустаан Бойтунов састааптаах дьүүллү сүбэ быһаарыаҕа.
Тэрийэр хамыыһыйа биллэрбитинэн, быйыл быыстапка куонкуруһугар Саха Сирин улуустарыттан биллэр-көстөр 60 маастардар кыттыахтара. Ону ааһан, үгэс курдук, аар-саарга аатырбыт саха быһахтарын, хомустарын оҥорбут маастардартан бэйэлэриттэн атыылаһыаххытын сөп. Биир ураты түгэнинэн Мандар Уус бэйэтэ оҥорбут былыргы боотур кэтэр, киирсэр сэбиргэлин, Дархан батыйаны уонна да атын сэби-сэбиргэллэри экспонат быһыытынан көрдөрүүгэ туруоруохтара. ххх
ххх
Манна диэн санаттахха, былырыыҥҥы «ДАРХАН УУС» 13-с төгүл ыытыллыбыт Саха Сирин тимир уустарын сүрүн быыстапкатын кыайыылаахтарынан биллэриллибиттэрэ:
«Бастыҥ уус-уран быһах», 5 уус кыттыбытыттан:
1 миэстэ Феликс Шамаев (Таатта);
2 миэстэ Лазарь Кынтояров (Томпо);
3 миэстэ Иван Саввинов (Ньурба).
Кыайыылаахха 50 тыһ. солк. уу харчынан бириис («Скам-групп» ХЭТ, директор Н.И. Акимов) туттарылыбыта.
«Бастыҥ ас быһаҕа», 44 уус кыттыбытыттан :
1 миэстэ Федор Неустроев (Таатта);
2 миэстэ Спартак Петров (Сунтаар);
3 миэстэ Николай Саввинов (Ньурба).
Кыайыылаахха бу сыл устатыгар «Сахабулт» бултуур ыырыгар тайаҕы бултуурга лицензия («Сахабулт» АО, директор э.т. Н.В. Степанов) анаммыта.
«Дэгиттэр быһах», 44 уус кыттыбытыттан:
1 миэстэ Гаврил Мохначевскай (Таатта);
2 миэстэ Феликс Шамаев (Таатта);
3 миэстэ Арсений Иванов (Ньурба).
Кыайыылаахха «Учур» булт маҕаһыыныттан 50 тыһ. солк. туоһу сурук (салайааччы Ю.Н. Большаков) бэрилибитэ.
«Эдэр кэскиллээх уус» анал аат 2008 с.т. Семен Гороховка (Мэҥэ-Хаҥалас) Таатта улууһун «Уйгу» маҕаһыыныттан 90 киилэлээх кыстык (салайааччы В.М. Никифоров) туттарылыбыта. Оттон «Аҕа саастаах уус» анал аат хаһаайыныгар, 1940 с.т. Николай Слепцовка (Таатта) «Учур» булт маҕаһыыныттан 20 тыһ. солк. суумалаах туоһу сурук («Осикат» булчуттар түмсүүлэрэ, салайааччы В.В. Алексеев) бэриллибитэ.
Хаартыска: Ньурба дьаһалтатын пресс-сулууспата, 2024 с.
-
1
-
0
-
0
-
0
-
0
-
0
