Былырыын Анал байыаннай дьайыынан сибээстээн, Кыайыы күнүн бэрт сэмэйдик бэлиэтээбиттэрэ, оттон быйыл үбүлүөйдээх сылга олохтоохтор бэтэрээннэрин хаартыскатын туппутунан «Өлбөт мэҥэ пуолкаҕа» тахсыахтара, киэһэ хараҥарбыт халлааны фейерверк күлүмүрдэс уотун суһума сырдатыа.
Икки сыллааҕыта өрөспүүбүлүкэҕэ аан бастаан оскуолаҕа киириэн иннинээҕи саастаах оҕолорго параат ыытыллыбыта. Ол үтүө үгэһи сөргүтэн быйыл 600 тахса кырачаан илии-илиилэриттэн сиэттиһэн, параакка хаамсан ааһыахтара.
Ону таһынан, байыаннай тиэхиньикэ быыстапката ыытыллыаҕа, папье-маше муляжтары дьон болҕомтотугар таһаарыахтара, куорат олохтоохторугар уонна ыалдьыттарыгар саллааттар хааһыларын амсатыахтара. Параат бары кыттыылаахтара Кыайыы үбүлүөйүнэн өйдөбүнньүк мэтээллэри ылан, түөстэригэр кэтиэхтэрэ.
Өксөкүлээх Өлөксөй аатынан норуот уус-уран айымньытын киинигэр Аҕа дойдуну көмүскээччилэргэ туһуламмыт улахан кэнсиэргэ Анал байыаннай дьайыы буойуннара эмиэ кыттыахтара.
Өрөспүүбүлүкэ оскуолаларыгар Аҕа дойду Улуу сэриитин, Анал байыаннай дьайыы дьоруойдарын паартатын арыйыахтара, кини хорсун быһыытын туһунан кэпсиэхтэрэ, үүнэр көлүөнэҕэ холобур оҥостуохтара. Эйэлээх олоҕу уһансыбыт саллааттар, өстөөҕү самнарбыт дьоруойдар туһунан билиһиннэриэхтэрэ.
«Тэрийэр кэмитиэккэ баарбын эрээри, Кыайыы күнүгэр туох буоларын барытын эрдэттэн кэпсиэхпин баҕарбаппын, дьон үөрүөн, соһуйуон наада.
Дьокуускай федеральнай бүддьүөттэн үбүлээһиҥҥэ киирэн, кэлэр сылларга өссө тупсан, кэҥээн-тэнийэн, киэркэйэн иһиэ. Кыайыы болуоссатын саҥардыы үлэтэ ыытыллыахтаах, онно уопсастыбаннас санаатын истэр тоҕоостоох.
Кыайыы пааркатыгар уот ситимэ тардылла илик, бу боппуруос быһаарылыннаҕына, үүнээйигэ уу кутарга носуостары холбуохтара. Гагаринскай уокурук управата итинэн дьарыктаныахтаах. Күөх үүнээйини олордобут эрээри, көрөр-истэр киһи суоҕуттан кууран-хатан хаалаллар. Дьоруойдарга тутуллубут пааматынньыктары эмиэ көрө-истэ сылдьыахха наада», — диэн этэр Сэрии, үлэ бэтэрээннэрин, сэбилэниилээх күүстэр уонна бэрээдэги араҥаччылыыр өрөспүүбүлүкэтээҕи уорганнар биэнсийэлээх дьонун уопсастыбаннай түмсүүтүн Дьокуускайдааҕы салаатын бэрэссэдээтэлэ Николай Тряпша.
Хаартыска: Николай Тряпша архыыбыттан.
-
0
-
0
-
0
-
0
-
0
-
0
