САХА СИРИГЭР
Аҕа дойдуну көмүскээччилэр күннэрин көрсө Ил Дархаммыт Айсен Сергеевич Аҕа дойду сэриитин кыттыылаахтарыгар "Саха сирин бочуоттаах олохтооҕо" ааттары үөрүүлээх быһыыга-майгыга иҥэрдэ, ону таһынан тыыл бэтэрээннэригэр уонна билигин буола турар анал байыаннай дьайыы кыттыылаахтарыгар эмиэ судаарыстыбаннай наҕараадалары туттартаата.
Айсен Сергеевич эппитинэн, билигин Саха сиригэр 9 Аҕа дойду сэриитин бэтэрээнэ, 16 Ленинград блокадатын кыттыылааҕа уонна концлааҕырга олоро сылдьыбыттар, 208 сэрии кыттыылааҕын огдооболоро, 1500 кэриҥэ тыыл бэтэрээнэ уонна 12 тыһыынча кэриҥэ сэрии сылын оҕолоро бааллар эбит.
-Амма улууһугар Алтаҥҥа саҥа култуура дьиэтэ аһылынна. Бу тэрээһиҥҥэ Ил Дархан Айсен Николаев кыттан, саха биллиилээх мелодиһа Валерий Ноев аатынан «Иэйии» култуура дьиэтэ нэһилиэк олохтоохторун түмэр үтүө түһүлгэ буоллун диэн эҕэрдэлээтэ. Ону тэҥэ Айсен Сергеевич ууну хачайдыыр скважина тутуутун кытта билсистэ. Нэһилиэккэ эбийиэк тыын суолталаах, ууну хачайдааһыны кулун тутар 8 күнүн көрсө саҕалыахпыт диэн тутааччылар үлэ 99% оҥоһуллубутун эттилэр.
- Ленскэй куорат аттыгар, "Саха сирэ" быһа түһэн сайдар территория тутуутун чэрчитинэн 555 мегаватт кыамталаах Новоленскэй ТЭС киирэрэ былааннанар. Станция Главгосэкспертизаны ааспыт, Орто Ботуобуйаттан ылыллар күөх төлөнүнэн уматыктаныаҕа дииллэр. ТЭС ирбэт тоҥ муус анныгар турбат буолан, конструкция тулуктаһыа диэн сылыктыыллар.
- Саха сирин Бырабыыталыстыбата 2030 сылга диэри туризм сайдыытын тосхолун (стратегиятын) бигэргэттилэр. Тосхол быһыытынан 2030 сылга Саха сиригэр кэлэр турист ахсаана сылга 750 тыһыынча киһиэхэ тэҥнэһиэхтээх, оччоҕо бүддьүөппүтүгэр туризмтан харчы киирэн экономикабыт биир сүрүн суолталаах эйгэтигэр кубулуйуо диэн суоттууллар. Туризм хас да хайысхатын сайыннарар былааннаахтар: ыраас тыытыллыбатах айылҕа кэрэ көстүүтэ, кыһыммыт тыйыс тымныыта, агротуризм уонна промышленнай туризм, ону таһынан киэҥ таһымнаах, бөдөҥ, элбэх дьону хабар тэрээһиннэргэ элбэх кыттааччылар, ыалдьыттар кэлиэхтэрэ диэн эрэнэллэр.
АРАССЫЫЙАҔА
- Анал байыаннай дьайыы: Арассыыйа аармыйата үс араас хайысхаларга Надеждинка, Новоселка уонна Новочеретоватое нэһилиэнньэлээх пууннары босхолоотулар.
- Арасыыйаҕа килиэп оҥорооччулар кулун тутар ыйтан килиэп сыанатын 10-12 бырыһыан үрдэтэр туһунан биллэрдилэр. 2025 сыл саҕаланарын саҕана киһи илиитигэр ылар килиэбигэр номнуо сыана үрдээбит этэ, ортотунан 5-7 бырыһыан үрдэппиттэр этэ, билигин килиэн оҥорооччулары кытта өссө тиэйээччилэрбит уонна атыылааччыларбыт сыаналарын үрдэттэхтэринэ, бурдук аспыт сыаната хармааҥҥа охсор курдук үрдүөн сөп диэн этэллэр.
- Арассыыйаҕа майнинговай фермалар 2024 сылга 7 бырыһыан элбээбиттэр. Санаттахха, былырыын майнинговай фермалар Дагестаҥҥа аһара элбээн уот арахсыытын коллапсын таһаара сылдьыбыттара. Судургутук эттэххэ, майнинговай ферма диэн хас да көмпүүтэри уокка холбоон кэбиһэн баран туруораллар, ол онно криптовалюта диэн харчы оонньонор үһү. Билигин майнинговай фермалар Иркутскай уобаласка элбээбиттэр, онно гидростанцияттан уоттанан олорор буоланнар электричество сыаната быдан чэпчэки эбит.
ДьолуКуус
Сонуннары көрүөххүтүн сөп: https://smi14.ru/ СЭРГЭХ СОНУННАР.
Туһаныллыбыт матырыйаал сигэлэрэ:Сахалыы бикипиэдьийэ - sah.wikipedia.orgКалендарь событий - www.calend.ruКакой сегодня праздник - www.kakoysegodnyaprazdnik.ruТелеграм-ханааллар: Улус-Медиа, SD Новости Якутии, 14News, РИА Новости, RT на русском, Лента дня, Контекст, Вечерний Телеграмъ.
Хаартыска: Улусмедиа
-
1
-
0
-
0
-
0
-
0
-
0
