Александр Атласов, Ил Түмэн Тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ:
– Оччотооҕу кэм оҕолорун курдук, 1983 с. алтынньытыгар Сэбиэскэй Аармыйаҕа ыҥырыллан, Забайкальскай байыаннай уокурукка тааҥка пуолкатыгар 6 ыйдаах үөрэххэ үөрэммитим. Тааҥкаҕа ыытааччы, мэхээньик быһыытынан сылдьыбытым, онтон атын массыынаҕа көһөрбүттэрэ. Салгыы Монголияҕа ыыппыттара, Чойр диэн кыра куоракка сибээһи олохтуурга бронетранспортеру ыытааччынан анаабыттара. Сайншад куоракка 1,5 сыл курдук артиллерийскай пуолкаҕа сулууспалаабытым, самоходнай орудиеҕа ыстаарсайынан сылдьыбытым.
Сайншад куоракка Монголия үрдүнэн улахан байыаннай үөрэх буолбута, авиацияттан саҕалаан, пехотаҕа, тааҥкабай дивизияҕа тиийэ, ракетнай установкалар, артиллерийскай гаубицалар мустубуттара. Биһиги онно кыттаары 200 км. айаннаан кэлбиппит, элбэх араас байыаннай тиэхиньикэ баарын, Сэбиэскэй Сойуус аармыйата кыахтааҕын онно сөҕө-махтайа көрбүтүм.
Монголияҕа сахалар олох аҕыйах этибит, Кавказтан, Орто Азияттан уолаттар элбэхтэрэ, 15 араас омук дьоно биир пуолкаҕа сулууспалаабыппыт. Бииргэ сулууспалаабыт дьоммуттан бэтэрээ диэкилэртэн син аҕыйах киһини кытта билсэбин.
Эр киһи доруобуйата эппиэттиир буоллаҕына, мин санаабар, аармыйаҕа булгуччу сулууспалыахтаах, сэрии сэбин, тиэхиньикэни тутан-хабан көрүөхтээх, уставной бэрээдэккэ үөрэниэхтээх. Инники өттүгэр олоҕор эргиччи туһалаах, тулууру-дьулууру үөскэтэр, эт-хаан өттүнэн ноҕоруусканы тулуйарга үөрэнэллэр. Биһиги саҕана аармыйаҕа 2 сыл сылдьарбыт, билигин ол болдьох биир сылга диэри кыччаан турар. Мин тус бэйэм аармыйаҕа баҕаран туран барбытым.
Эр киһи бэйэтин дойдутун таптыахтаах, наада буоллаҕына, көмүскүөхтээх.
-
3
-
0
-
0
-
0
-
0
-
0
