Александр Корякин, Ил Түмэн Тутууга, олох-дьаһах, хомунаалынай хаһаайыстыбаҕа уонна энергетикаҕа сис кэмитиэтин бэрэссэдээтэлэ:
– Мин Сэбиэскэй Аармыйа кэккэтигэр 1984-1986 сс. Забайкальскай байыаннай уокурукка, Бурятияҕа салгынтан саба түһүүнү көмүскүүр чааска (противовоздушнай оборонаҕа) сулууспалаабытым. Интернациональнай састааптаах этибит, Сэбиэскэй сойуус араас уһугуттан тус-туһунан итэҕэллээх, иитиилээх, олоххо көрүүлээх дьон мустубуппут. Прибалтикаттан, Орто Азияттан уолаттар кэлбиттэр этэ, бэл грек омуктар кытта бааллара.
18 саастаах чолоҕор уолаттар эр киһи кэлэктиибигэр олорорго үөрэммиппит, олох оскуолатын ааспыппыт, ким хайдах майгылааҕа онно тута биллэрэ. Эр киһини иитэн таһаарарга аармыйа суолтата сүҥкэн улахан.
Саха Сириттэн бииргэ сулууспалаабыт дьоммун кытта баччааҥҥа диэри дөрүн-дөрүн билсэбит, биирбит Черскэйгэ, ким Мохсоҕоллооххо, Дьокуускайга олороллор.
Сэбиэскэй кэминээҕи иитиинэн уолаттар бары аармыйаҕа сулууспалыахтаахтар диэн өйдөбүл баара. Икки сыл иһигэр дойдубар уоппускабар кэлэ сылдьыбытым, ол кэминээҕи пуормам китель билигин даҕаны баар, биллэн турар, размера олох атын.
Мин идэбинэн өр кэмҥэ эр дьон кэлэктиибигэр, хомунаалынай сулууспаҕа үлэлээбитим, аармыйаҕа сылдьыбытым улаханнык көмөлөспүтэ дии саныыбын.
Хас биирдии уол эр дьон кэлэктиибигэр үөрэниэхтээх, оччотугар бэйэтигэр эрэллээх, дьону, олоҕу сатаан өйдүүр буолар.
Күн бүгүн уопсастыбаҕа дойдуга бэриниилээх буолуу тиийбэт дииллэр, ону аармыйаҕа булгуччулаах сулууспаттан саҕалыахтаахпыт, төрөппүттэр төрөөбүт дойдуга истиҥ тапталы иҥэрэн, үтүө холобуру көрдөрүөхтээхтэр.
Аҕа дойдуну көмүскээччилэри, эдэр көлүөнэни иитэн таһаарарга оскуолаҕа байыаннай бэлэмнэнии уруога киирдэ, араас спортивнай хамсанар оонньуулары тэрийэллэр, Анал байыаннай дьайыыттан кэлбит буойуннар бэйэлэрин уопуттарын кэпсииллэр.
-
1
-
1
-
0
-
0
-
0
-
0
