Кини былырыын полиция састааба Арассыыйа Бэрэсидьиэнин быыбарыгар, «Азия оҕолоро» аан дойдутааҕы успуорт оонньуутугар уонна 200-чэкэ араас тэрээһиннэргэ маннык уустук кэмҥэ нэһилиэнньэҕэ куттал суоһаабатын, уопсастыбаннай бэрээдэк кэһиллибэтин туһугар күүскэ үлэлээбитин бэлиэтээтэ. Ону таһынан, Арассыыйа сэбилэниилээх күүһүгэр дьону хомуйарга миниистир тус хонтуруолга ылан, улахан үлэ ыытыллыбытын иһитиннэрдэ.
Миниистир этэринэн, Саха Сирэ Уһук Илин буруйу оҥорууга кыра көрдөрүүлээх субъект ахсааныгар киирэр, киһини өлөрүү аҕыйыы турар. Маны ситиһэргэ өрөспүүбүлүкэ ситэриилээх, сокуону таһаарар былааһын уорганнара бэрээдэги араҥаччылыыр үлэһиттэри кытта бары күүстэрин түмэн үлэлээтилэр. Өрөспүүбүлүкэтээҕи уонна муниципальнай бырагыраама иһинэн буруйу оҥорууну сэрэтэр, эрдэ тохтотор үлэ ыытыллар.
Кэлиҥҥи кэмҥэ дьон масыанньыктарга итэҕэйэн, кинилэр угаайыларыгар киирэн биэрэн, электроннай информационнай технология эйгэтигэр буруйу оҥоруу үрдээбитэ этилиннэ, оттон хоромньу 1 млрд. солк. куоһарда. Дистанционнай ньыманан харчыны уоруу ахсаанын аччатарга полиция үлэһиттэрэ киэҥ хабааннаах үлэни ыыттылар эрээри, кыайан арыллыбакка хаалбыт буруйу оҥорууга бу хайысха 60% ылар.
Масыанньыктар угаайыларыгар боростуой эрэ дьон буолбакка, тэрилтэ салайааччылара, муниципальнай тэриллиилэр баһылыктара кытта киирэн биэрэллэр эбит. Онон нэһилиэнньэ ортотугар сэрэтэр, үөрэтэр үлэ оҥоһуллара, сыыппара эйгэтигэр дьон билиитин хаҥатарга тустаах үлэ ыытыллара наадалааҕын туһунан миниистир бэлиэтээтэ.
Владимир Прокопенко иһитиннэрбитинэн, өрөспүүбүлүкэҕэ киһини соруйан өлөрүү ахсаана 1,5 төгүл аччаабыт, киһи доруобуйатыгар ыарахан содулу оҥоруу 6,5 төгүл намтаабыт, уоруу 10%, киһиэхэ саба түһэн сыаналаах малын, харчытын былдьааһын (грабеж) 1,5 төгүл, маҕаһыыннары халааһын (разбой) 2,2 төгүл кыччаабыт, массыынаны күрэтии 21% түспүт.
-
0
-
0
-
0
-
0
-
0
-
0
