Ити ыксаллаах кэмҥэ Саха Өрөспүүбүлүкэтин бырабыыталыстыбата суһал миэрэлэри ылынан, наадалаах оборудование, өрөмүөннүүр матырыйааллар тириэрдиллибиттэрэ. Ол түмүгэр оскуола, фельдшерскэй-акушерскай пуун уотунан ититиигэ көһөрүллүбүттэрэ. Ил Дархан Айсен Николаев сорудаҕынан саҥа тутулла турар хочуолунайы болдьоҕун иннинэ үлэҕэ киллэрии былаана оҥоһуллубута.
«Эдьигээҥҥэ сылдьыбыт сирдэрбититтэн биир саамай тутаахтара Бэстээххэ тутулла турар саҥа хочуолунай», – диэн СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников телеграм-канаалыгар суруйар.
Сыл саҕаланыыта оскуола-саад, дьон олорор дьиэлэрэ уонна гараас оттуллан олорбут хочуолунайдара сөргүтүллэр кыаҕа суох буола баһаарга былдьаммыта. Онон урукку хочуолунай оннугар бэрт кылгас болдьохтоох кэмҥэ 2,5 МВт кыамталаах саҥа хочуолунай тутулунна.
Кулун тутартан номнуо үлэтин саҕалыахтаах уонна 32 дьиэни кытта икки социальнай эбийиэги сылааһынан хааччыйыахтаах.
Бэлиэтээн эттэххэ, саҥа хочуолунайга 1,25 МВт кыамталаах икки хочуолу кытта, 1,74 МВт кыамталаах саппаас оһох үлэлиэхтэрэ.
Эбийиэк тутуута «ЖКХ «Альтернатива» ХЭТ инвестициялыыр бырагырааматынан кылгас кэм иһигэр түмүктэннэ. Оттук сезона тохтобула суох ааһарын туһугар уматык Кировскай чохтоох сириттэн тиэллиэ.
ххх
Ону тэҥэ, быйыл тохсунньуга Эдьигээн уулуһун киинигэр “Кыайыы 65 сыла” кыбартаалынай хочуолунайга аварийнай быһыы-майгы тахсан, бүтүн бөһүөлэк 4 хонук устата тохсунньу тымныытын кытта турууласпыта. Бырабыыталыстыба отчуоттуур бөлөҕө бу тыын эбийиэккэ сылдьан, быйыл хочуолунайга биирдиитэ 3,5 МВт кыамталаах 4 хочуолу туруорарга былааннаатылар. Бу аныгы, улахан көдьүүстээх уонна ордук кыамталаах хочуоллар эргэрбиттэри солбуйан, Эдьигээн аны улахан тымныыларга итиинэн эрэллээхтик хааччыллыаҕа.
Хаартыскалар Садовников Д.Д. телеграм-ханаалыттан
-
1
-
0
-
0
-
0
-
0
-
0
