Ил Түмэҥҥэ “Биир Ньыгыл Арассыыйа” баартыйа фракциятын салайааччыта Алексей Колодезников билиһиннэрбитинэн, фракция чилиэннэрэ бу сокуон барылын бастакы, иккис ааҕыыны ааһар кэмигэр ымпыктаан-чымпыктаан үөрэппиттэрэ.
“Көстөрүн курдук, дойду эрэгийиэннэрин этиилэрин, туруорсууларын кэнниттэн сокуон барылыгар балачча көннөрүүлэри киллэрбиттэр. Онон Госдуума уонна Арассыыйа субъектарын сокуону оҥорооччуларын кытта бэрт көдьүүстээх хардарыта сыһыан олохтоммута көстөр. Ону таһынан, Госдуумаҕа киирбит баартыйалар дьокутааттара сокуон барылын тэҥҥэ оҥорсубут ааптардарынан буолаллара бэрт улаханы суолталыыр”, -диэн фракция салайааччыта бэлиэтиир.
Биллэрин курдук, бу сокуон барыла саҥардыллыбыт эрэдээксийэтинэн Госдуумаҕа иккис ааҕыытын бу соторутааҕыта, олунньу 26 күнүгэр ааспыта.
Алексей Зосимович бу сокуон Госдуумаҕа ылынылыннаҕына, Федерация Сэбитигэр өйөннөҕүнэ уонна Арассыыйа Бэрэсэдьиэнэ бигэргэттэҕинэ, Ил Түмэҥҥэ «Биир Ньыгыл Арассыыйа» баартыйа фракция чилиэннэрэ сокуон өрөспүүбүлүкэҕэ олоххо киириитигэр эппиэтинэстээхтик ылсыахтара диэн быһаарар. Ол курдук: «Саха Сирин Ил Дархана Айсен Сергеевич Николаев биһиги өрөспүүбүлүкэбитигэр икки таһымнаах муниципальнай былаас тиһигэ оннунан хаалыаҕа диэн чопчу позициятын биллэрбитэ», -диэн
чорботон тоһоҕолоото.
Сокуон барылын билиҥҥи эрэдээксийэтин көрүҥүнэн, эрэгийиэннэр муниципальнай былаас хас таһымнаах буоларын -биир дуу, икки дуу таһымнаах буоларын бэйэлэрэ быһаарыахтарын сөп. Ол аата, эрэгийиэн дьокутааттара билиҥҥини баарынан хаалларарга быһаардахтарына, уларыйыы тахсыбат, уруккутун курдук икки таһымнаах буолар. Оттон дьокутааттар биир таһымнаах былааһы киллэрэргэ диэн куоластаатахтарына, куораттааҕы уокуруктары уонна муниципальнай уокуруктары территориальнай олохтоох дьаһалталарынан уларытан тэрийии соруга турар. Сокуон барылыгар ыйыллыбытынан, куораттааҕы уонна муниципальнай уокуруктар бэрэстэбиитэллээх уорганнарын дьокутааттара уруккутун курдук муниципальнай быыбардарынан талыллыахтаахтар. Оттон баһылыктары талыы үс көрүҥнээх буолар: муниципальнай быыбардарынан талыы, муниципальнай тэрээһин бэрэстээбитэллээх уорганнара бэйэлэрин састааптарыттан эбэтэр муниципальнай тэрээһин бэрэсэтэбиитэллээх уорганнара эрэгийиэн баһылыга киллэрбит кандидааттарыттан талыахтарын сөп.
Биллэрин курдук, бу ураты суолталаах сокуон барылын дьүүллэһии бара турдаҕына, 2022 сыллаахха Саха Сирин парламена эрэгийиэннэргэ олохтоох салайыныы уорганнарын үлэлэлэрэ уратылааҕын, араастааҕын туһунан этиилэри киллэрэн турар.
Ил Түмэн пресс-сулууспата
Хаартыска Ил Түмэн
-
0
-
0
-
0
-
0
-
0
-
0
