Владимир Прокопенко дьон полицияттан уурайан барар сүрүн биричиинэтэ - үлэһит тиийбэтиттэн сылтаан улахан ноҕоруускалаах үлэ хамнаһа кыратын эттэ. Оттон үлэлиир сиригэр дьиэтэ суох полиция үлэһиттэригэр муниципальнай дьиэ-уот пуондатыттан дьиэ биэрэргэ, бу боппуруоһу муниципальнай тэриллиилэр баһылыктара быһааралларыгар этии киллэрдэ.
ИДьМ миниистирин дакылаатын истэн баран уонтан тахса дьокутаат үгүс-үтүмэн ыйытыктары биэрдилэр. Елена Голомарева Аартыка улуустарыгар полиция үлэһиттэрин хамнаһа тоҕо тэҥэ суоҕун, кыратын, итиэннэ автодромнары арыйыы туһунан туоһуласта.
«РФ Ис дьыалаҕа миниистирэ Владимир Колокольцев этэринэн, Анал байыаннай дьайыы бүтүөр диэри полиция үлэһиттэригэр хамнас үрдүүрэ күүтүллүбэт, оттон хотугу эбилик кээмэйин Арассыыйа Бырабыыталыстыбата быһаарар. Автодрому арыйыынан муниципальнай былаас дьарыктаныахтаах», — диэн хардарда Владимир Прокопенко.
Иван Луцкан полиция үлэһиттэрэ сокуоннайа суох атыыланар төһө элбэх итирдэр утаҕы былдьаабыттарын, бутлегердары кытта хайдах үлэлииллэрин, IT хайысханан буруйу оҥорууну арыйыы түмүгүн уонна ханнык түгэҥҥэ дьон харчыта кыайан төннүбэтин ыйыталаста.
«Быйыл икки ый иһигэр 50-ча киһи Горнай, Сунтаар, Бүлүү, Үөһээ Бүлүү, Уус Алдан, Амма, Алдан, Нерюнгри оройуоннарыгар сырыттылар. Былырыын 18500 бытыылканы былдьаабыппыт, быйыл 33760 лиитэрэ итирдэр утаҕы атыыттан ыллыбыт. IT хайысханан оҥоһуллар буруйу арыйарга анал управление тэрийэн, үлэһиттэр ахсааннарын элбэттибит. Атын субъектары кытта тэҥнээтэххэ, буруйу арыйыы үрдүк көрдөрүүлээх. Былаас бары таһымыгар айти хайысханан оҥоһуллар буруйу тохтоторго ылсыахтаахпыт, оччоҕо үтүө түмүк тахсыаҕа. Күн аайы мөлүйүөнүнэн масыанньыктар араас дьоҥҥо эрийэллэр, итэҕэйимтиэ дьон киирэн биэрэллэр», — диэтэ миниистир.
Василий Николаев дьон социальнай ситимнэргэ, бассаап статуһугар ыалдьыбыт киһи (оҕо) суһаллык эмтэнэ барарыгар харчы хомуйаллар, онтон Горнай улууһугар итинник сыалга сымыйанан харчы хомуйбуттарын аҕынна.
Хаартыска СИА.
-
0
-
0
-
0
-
0
-
0
-
0
