Ил Дархан Айсен Николаев эппитинэн, Петр Киприянов Саха Сирин уонна Арассыыйа хорсун уола, эппиэтинэстээҕин, хорсунун иһин бииргэ сулууспалыыр байыастара ытыктыыллара.
«Саха Сирин хорсун уола, Хаҥалас улууһун олохтооҕо, мотострелковай взвод хамандыыра, младшай лейтенант Петр Киприянов төрөөбүт дойдутун туһугар олоҕун толук уурбута. Кыайыы туһугар тиһэх мүнүүтэтигэр диэри киирсибитэ», — диэтэ Айсен Николаев.
«Бүгүн генерал-майор Евгений Леонтенкову кытта Аҕа дойдуну көмүскүүргэ олоҕу олоҕун толук уурбут Арассыыйа Дьоруойа Петр Киприянов аймахтарыгар «Көмүс көмүс Сулус» мэтээли туттардыбыт.
Дьиҥнээх патриот, эрэллээх уонна хорсун командир — кини Дьоруойбут этэ. Петр өстөөҕү кытта аан бастакынан утарыласпыта, атыттары батыһыннарбыта, байыастары уустук балаһыанньаттан таһаарбыта. Бииргэ сулууспалааччылара киниэхэ мэлдьи эрэнэллэрэ. Петр тапталлах ыал оҕото, кэргэн, ыал аҕата этэ. Саха Сирэ бүттүүнэ төрөппүттэрин кытта тэҥҥэ ыар сүтүгү бииргэ үллэстэр. Биһиги Арассыыйа Дьоруойун туһунан уонна Кыайыы туһугар олохторун толук уурбут бары дьоруойдарбытынан өрүү саныы, ытыктыы сылдьыахпыт. Бары хорсун буойуттарбытыгар Уруй-Айхал! Арассыыйа Дьоруойа Петр Киприяновка үйэлэргэ Албан аат!», — диэтэ Айсен Николаев.
Илиҥҥи байыаннай уокурук матырыйаалынай-тиэхиньиичэскэй хааччыйыытын ыстаабын начаалынньыга Евгений Леонтенков иһитиннэрбитинэн, Петр Киприянов 2024 сыл балаҕан ыйыгар бэйэтин састаабынан утарылаһааччыны хас да төгүл штурмалаабыт. «Хас биирдии штурмҥа куттаммакка утарылаһара. Утарсааччы позициятын сэриилээн ылан, атын штурмалыыр бөлөхтөр салгыы кимэллэригэр кыах биэрэрэ»,-- диэн туран генерал-майор Дьоруой аймахтарыгар махталын биллэрдэ.
Петр Александрович Киприянов — «Монгол» 1985 сыллаахха Покровскайга төрөөбүтэ. Мохсоҕоллоох орто оскуолатын 9-с кылааһын бүтэрэн, кэллиэскэ автомеханик идэтин баһылаабыта. Кэргэнэ Зинаида Васильевнаны кытта биэс оҕону ииппитэ. «РИК Автодор» ААУо-ҕа үлэлээбитэ. Кини Анал байыаннай дьайыы кэмигэр Саха Сириттэн дойду үрдүкү наҕараадата туттарыллыбыт 11-с буойун буолар. Бу иннинэ Арассыыйа Дьоруойун үрдүк аата Родимир Максимовка, Игорь Юргиҥҥа, Николай Соболевка, Александр Колесовка, Филипп Евсеевкэ, Алексей Неустроевка, Дмитрий Егоровка, Дмитрий Куценкоҕа, Николай Евдокимовка, Андрей Григорьевка иҥэриллибитэ.
Хаартыска: СИА
-
1
-
0
-
0
-
0
-
1
-
0
