Уопсастыба

Сахабыт Сирин киинэ тыйаатырдарыгар кулун тутар 27 күнүттэн «Speed Star» диэн спортивнай байопик тахсыаҕа. Бу киинэ дьиҥ олоххо буолбут түгэҥҥэ олоҕуран уһулунна. 2010-2011-2012 сс. Ил Дархан бирииһигэр үс төгүл бастаабыт, соҕуруу дойдуттан кэлбит боруода хааннаах сүүрүк ат уонна кини кыайыыга дьулуурун арыйбыт жокей Егор Оконешников олоҕун көрдөрөр.

«Speed Star» ийэтэ-аҕата ат сүүрдүүтүн чөмпүйүөннэрэ эрээри, уһун көбүс-көнө атахтаах ат Дьокуускайга кэлэн, атын жокейга түбэһэн, бастакы сүүрдүүгэ аһары эрдэ инники түһэн, түргэнник сылайан, үһүс эрэ миэстэҕэ тиксэр. Кыайыыга эрэммит жокей кыһыытыттан атын тахсан кырбыыр.

Ону истэн Егор табаарыһын тохтотон, аты көмүскэһэн, уоскутан, кинини кытта уопсай тылы булан, доҕордоһон, өссө түргэнник сүүрэр ис кыаҕын арыйар. Кини аты кытта бодоруһуоҕуттан «Speed Star» күүрээннээх күрэхтэһиигэ үс сыл тухары иннин кимиэхэ даҕаны биэрбэккэ, биэтэккэ бастакынан кэлэр. Итиниэхэ тириэнньэр Сергей Петрович сүбэтэ-амата көмө буолар, ат суолга тахсаатын кытта тута түһэн, кини бейсболканан бэлиэ биэрдэҕинэ биирдэ күүскэ сүүрдэн, барыларын тыал курдук ситэн ааһар.  

Сүүрүк аты элбэх киһи ымсыыра, ордугургуу көрөр, хара санаалаах дьон тыҥааһыннаах күрэхтэһии иннигэр «Speed Star»-га уоран киирэн кыаҕын өһүлэр укуол биэрэллэр. Ол тугунан түмүктэммитин киинэни көрдөххүтүнэ билиэххит.

Артыыстар Павел Ченянов (жокей Егор Оконешников), Иннокентий Луковцев (тириэнньэр Сергей Ядреев) оруолун бэрт чаҕылхайдык арыйдылар. Киинэ сценарийа табыллан,  көрөөччү биир тыынынан көрөр, экраҥҥа көстөр дьоруойдар туһугар долгуйа олорор.

Продюсер Степан Порядин этэринэн, бу түөрт сыллаах, 10 мөлүйүөн солк. бүддьүөттээх  үлэ түмүгэ улахан экраҥҥа тахсыаҕа. Устар бөлөх сылгы хаһаатыттан тахсыбакка киинэни устубут, ол сыта таҥастарыгар барытыгар иҥэн хаалан, уопсастыбаннай сиргэ киирдэхтэринэ дьон тэйэ хаамара. Сайыҥҥы кэмҥэ гирлянда курдук ыйана сылдьар сахсырҕа элбэҕэ сөхтөрбүт.  Ити барыта киинэҕэ баар.

Устар бөлөх Үс хатыҥҥа ыһыахха ипподромҥа ат сүүрдүүтүгэр реклама уста сылдьан, 10 000 киһи стадиоҥҥа мустан, сүүрүк аттарга ыалдьан, хаһыы-ыһыы, уксуу, драйв энергетикатын таба көрөн, ол устуоруйатын киинэ нөҥүө дьоҥҥо тиэрдиэн баҕарбыт.  

Ол идиэйэни олоххо киллэрэргэ култуура министиэристибэтигэр сценарийдарын, симиэтэлэрин көмүскээн, 4,8 мөл. солк. гыраан ылбыттара. Бу үбүнэн сүүрүк аты атыылаһан, офис арыйан, үлэлээн барбыттара. Ону таһынан, «Синет», “Гедеон Строй”  хампаанньа үбүлээбиттэрэ, сорҕотун устар хамаанда бэйэтэ булбута. Уопсайа бүддьүөт 10 мөлүйүөн солк. этэ даҕаны, кэккэ каадырдары устарга ити үп тиийбэккэ, араас түгэнтэн тахсар булугас өйдөрүн туһаммыттара.

«Билигин итиччэ үбүнэн киинэ устубаппын, сыана барыга-бары наһаа ыараата, исписэлиис аҕыйах. Үбүлээһин өттүнэн күүс-көмө көстүбэтэҕинэ, хаачыстыбалаах киинэ аҕыйыан сөп», — диэн этэр продюсер.

Режиссер-сценарист Алексей Амбросьев - Чоох Мунду аты сүүрдээччилэр харчы туһугар киирсэллэр, ол иһин бэйэ-бэйэҕэ мэһэйдэһэллэрин «Speed Star» үһүс күрэхтэһиитигэр аты мөлтөтө сатаан, укуол биэрбиттэрин көрдөрөр. Оттон хамсыыр-харамай уонна киһи бэйэ-бэйэлэрин өйдөстөхтөрүнэ баар харгыстары этэҥҥэ туорууллар, укуолга да бэриммэттэр. Чаҕылхай боруода ат рекордун күн бүгүҥҥэ диэри куоһара иликтэр.

Иннокентий Луковцев тириэнньэр оруолун толорорго идэтийдэ диэххэ сөп, бу иннинэ кини «Триумф» киинэҕэ сахалартан тустууга олимпийскай чөмпүйүөннэри иитэн таһаарбыт аатырбыт Дмитрий Коркин оруолун оонньообута. Оттон аты сүүрдээччилэри эрчийэр тириэнньэр Сергей Ядреев быйыл 60 сааһын туоларыгар киинэ бэртээхэй бэлэх быһыытынан таҕыста.  

Артыыс Павел Ченянов аты сүүрдэн иһэн, бэйэтэ аты кытта ат буолан, сирэйдиин-харахтыын өрө күүрэн иһэрин, кыайыыга дьулуурун киһи эрэ астына-дуоһуйа көрөр. Киинэни көрбүт оҕолор ийэлэрин атта атыылаһан биэр диэн хаайбыттарын туһунан бүгүҥҥү пресс-кэмпириэнсийэҕэ эттилэр.  

Ааптар хаартыскаҕа түһэриитэ.