Хайыһардьыттар 80 км өрүс устун тэбэн Лээгигэ тиийиэхтээхтэр уонна онно Амма улууһа өрөспүүбүлүкэҕэ бастакынан Кыайыы күнүн көрсүөҕэ. Хайыһардьыттар ортолоругар Арассыыйа, өрөспүүбүлүкэ чемпионнара Николай Максимов, Никита Шестаков, марафоннар кыттыылаахтара Анастасия Степанова уонна да аттыттар бааллар. Десаны хайыһарга бастакы разрядтаах, элбэх күрэхтэһиилэр кыайыылаахтара, призердара Игорь Петров салайар. Күрэхтэһии кылаабынай судьуйата - хайыһарга маастарга кандидат, спорт бэтэрээнэ Евгений Прокопьев.
Хайыһар десанын кыттыылаахтарын улуус баһылыгын социальнай боппуруостарга солбуйааччы Ньургуйаана Илларионова, нэһилиэк баһылыга Захар Александров, улуустааҕы бэтэрээннэр Сэбиэттэрин бэрэссэдээлэ Мария Захарова эҕэрдэлээтилэр. Салгыы автодесант Лээгигэ айаннаан тиийэн, Кыайыы скверигэр сүгүрүйүөхтэрэ.
Хайыһар десанын састааба
Шестаков Никита – Хайыһарга спорт маастара, Амма нэһилиэгэ
Максимов Николай – Биатлонҥ спорт маастара, Амма, Сулҕаччы
Петров Игорь – Хайыһарга бастакы разрядтаах хайыһардьыт, Амма, Покровка
Голоков Константин – Хайыһарга бастакы разрядтаах хайыһардьыт, Хаҥалас
Макаров Никита – Хайыһарга бастакы разрядтаах хайыһардьыт, Хаҥалас
Заровняев Иван - Хайыһарга иккис разрядтаах хайыһардьыт, Амма нэһилиэгэ
Софронов Василий - Хайыһарга иккис разрядтаах хайыһардьыт, Амма
Дьячковский Мирослав – Хайыһарга маастарга кандидат, Уус-Майа
Лобоков Александр - Хайыһарга маастарга кандидат, Уус-Майа
Борисова Айталина - Хайыһарга бастакы разрядтаах хайыһардьыт, Амма
Степанова Анастасия – Амма, Эмис
Алексеева Валентина – Амма
Федорова Дария – Амма, Чакыр
ххх
Лээгигэ айан сыллата ыытыллар тэрээһин быйыл Улуу Кыайыы 80 сылын чэрчитинэн “Кыайыы марафона” хайыһар турнирынан уонна "Өбүгэ ыллыгынан" массынанан айанынан ыытыллар.
Лээгиттэн уоттаах сэриигэ барбыт хорсун буойуттар сырдык кэриэстэригэр анаммыт тэрээһин "Ким да умнуллубат,туох да умнуллубат!" диэн доҕуһуолунан барар.
Ол курдук, бүгүн сарсыарда Өнньүөс сэлиэнньэтиттэн, П.И. Яковлев аатынан Амма-Наахара орто оскуолатыгар мустуу саҕаланна уонна 6 чааска “Кыайыы марафона” хайыһарга турнирыгар старт бэрилиннэ.
Салгыы айан былаана маннык быһыылаахтык торумнанна.
09.00 ч. - "Өбүгэ ыллыгынан" айан кыттыылаахтарыгар алгыс сиэрэ-туома толоруллуоҕа
09.30 ч. - Айаҥҥа турунуохтара.
11.00 ч. - Өнтө хайатыгар тохтоон сынньаныахтара. Онтон чугас Бэрдьигэскэ Лээги нэһилиэгин кыраныыссатыгар киириигэ сири-уоту алаадьынан, кымыһынан маанылаан, сиэри-туому толоруохтара.
12.00ч. – Төгүлтэ Төрдүгэр (Лээги нэһилиэгин киинэ) тиийиэхтэрэ. Айан кыттыылаахтара транспараннары тутан бөһүөлэк илин баһыттан, уруку балыыһа турбут сириттэн бары Аҕа дойду сэриитин буойуттарын, тыылга үлэлээбиттэр хаартыскалаах «Өлбөт-өспөт полка» сэлэлээн хааман киириэхтэрэ..
12.20- Төрүттээх киһи түөрэҕэ түҥнэстибэт. Аат ааттаан кэлбит төрүт сирдэригэр Төгүлтэҕэ ытыктабылларын - төрөөбүт айылҕаны кытта ситимнэрин биллэрэн салама ыйыахтара
Алгыс сиэрин-туомун алгысчыт Устинова Сардаана Михайловна-Чылымтаана толоруоҕа.
Аан дойдуну уолутан, эмискэччи соһутан, алдьархайдаах уот сэрии аймаабыта күн сирин, бу сэриигэ Лээгиттэн төрүттээх-уустаах 122 киһи ыҥырыллан барбыта. Буулдьа,буорах аннынан Ийэ дойдуларын көмүскээн дьоллоох олох туһугар олохторун 38 киһи сэрии уоттаах толоонугар көмүс уҥуохтара хаалбыта.
Сэрии сылларыгар бэйэлэрин харыстаммакка үлэлээбит "Калинин" уонна "Чкалов" аатынан холкуостар 72 чилиэнэ "Аҕа дойдуну көмүскүүр Улуу сэрии 1941-1945 сылларыгар «Килбиэннээх үлэтин иһин» мэтээлинэн наҕараадаламмыттара.
Бу күн лээгилэр "Ахтан санаан ааһыаҕын" ырыа доҕуһуолугар буойуттар үтүө ааттарыгар үйэлээх саас сүгүрүйэн - чуумпуран-иһийэн ылыахтара
Бүгүҥҥү умнуллубат биир кэрэ,бэлиэ күнү өйдүү-саныы сылдьарга анаан бары айан кыттыылаахтара хаартыскаҕа түһүөхтэрэ
Ол кэннэ, үгэс быһыытынан Лээгилэр тумус киһилэрэ, биллиилээх предпридниматель Руслан Федотов биир дойдулаахтарыгар анаан бэлмэнээбит остуолугар оллоонноон олорон аһыахтара, сэниэ-киллэриниэхтэрэ, сэһэргэһиэхтэрэ уонна оҕо эрдэххэ оонньоммут оонньууга кыттыһыахтара. Салгыы төрөөбүт буор ахтылҕана-төрөөбүт түөлбэҕэ сүгүрүйүү быһыытынан олорбут тиэргэннэрин, өтөхтөрүн хаардыахтара. Түмэли көрүөхтэрэ, хаартыскаҕа түһүөхтэрэ уонна төттөрү айаҥҥа турунуохтара.
Хаартыскалар: "Амма олоҕо" телеграм-ханаалыттан
-
5
-
0
-
0
-
0
-
0
-
1
