Уопсастыба

Аара суолга Еланкаҕа тохтоон, хайа хаспаҕын көрдүбүт, кыһыҥҥы халыҥ хаар уулуннаҕына, манна күрүлгэн уута үөһэттэн кутуллан түһэр диэн кэпсииллэр.

Өлүөнэ очуостарыгар киирии билиэт 700 солк., дьэ уонна саҥа оҥоһуллубут мас бүрүөһүннээх тротуар суол устун 9 тохтобулу уҥуордаан, хайа кэтэҕинэн эргийэн, 2,6 км. сатыы хааман, үөһэ тахсаҕын, онтон оччону түһэн, уопсайа 5,2 км. эргийэн кэлэҕин. Бастаан дабайыы олох сыырынньа, онтон сыыйа үрдээн барар. 

Тохтобул аайы олорон сынньанарга ыскамыайка, итиэннэ: «Биир да хардыыны кэнниҥ диэки чугуруйума, иннигэр өссө үчүгэй көстүү күүтэр!», — диэн санааҕын көтөҕөр суруктар бааллар. Хайаны дабайа, ырааҕы хаама үөрүйэҕэ суох оҕолор суол кытыытыгар хаарга сытынан кэбиһэллэр. Улахан да киһи сылайдаҕына оҕо курдук хаарга сытыан баҕарар.

Үөһэ аһаҕас сиргэ тымныы буолуо диэн сэрэххэ омуннаах дьон халыҥ таҥаспытын толору кэтэн баран, бииртэн биир үктэли дабайан истэх аайы көлөһүнүҥ чаккырас, таҥаһыҥ ыгыллар уу. Кыһыҥҥы бэргэһэм биэдэрэлээх ууттан ороон ылбыт курдук түүтэ сыста сылдьар буолла.

Аны саамай үөһэ тахсан баран өрөбүл күн хаартыскаҕа түһээри 1-1,5 чаас уочараттаан тураҕын, бастаан итииргээбитиҥ ааһан, көлөһүнүҥ кууран, өр турдаххына ыбыгыраччы тоҥон бараҕын. Кэннигиттэн дьон күүтэн турар буолан, үөһэттэн Өлүөнэ эбэ кэрэ көстүүтүн баҕаҥ хоту өр одуулаан турбаккын. Биһиги сырдыкка кэлбиппит, хаһан түһүөхпүтүгэр диэри халлаан хараҥарда.

Бу санаатахха, урукку кирилиэс быдан туруору, дабайарга түргэн этэ, саҥа оҥорбут суоллара эргиир эрээри, сыырынньа, дьон халтарыйбатын диэн анал бүрүөһүннээх. Сайын чараас таҥастаах үөһэ тахсар чэпчэки, кыһын-саас халыҥ таҥаһыҥ баттыыр, бүтэй салапааны бүрүнэн баран тахсар курдук итииргэтэр эбит.

Эбии төлөөн Өлүөнэ очуостарын прожектор уотунан сырдаппыттарын, күлүмүрдүү турар муус оҥоһуктары, «Игры престолов» тронун көрдүбүт, оҕолор сыыртан хатааһылыыллар, катокка хаҥкылыыллар. Киэһэ атахпыт дэлби тоҥон, аһыыр сиргэ киирбиппит былыргылыы хаптаһынынан оҥоһуллубут уһун синньигэс ыскамыайкалар, кыараҕас хос иһэ тобус-толору дьон, киирии-тахсыы, аалыҥнаһыы. Пуховиккын устан уурар да сир суох, похуодунай усулуобуйа.

Манна элбэх омук кэлэр, ааһан иһэн: «Viva Russia» дэһэллэр, саха национальнай таҥаһын уонна бөрө тириитин кэтэн үөрэ-көтө хаартыскаҕа түһэллэр, омуктар итии хааннаах дьон хайаҕа тахсарга бэргэһэтэ суох сылдьаллар.

Ытык сир ураты эниэргийэлээх, итиччэ үрдүк очуоска тахсан баран киһи сылайбат эбит, сибиэһэй салгыҥҥа сылдьан, астынан-дуоһуйан кэлэҕин. Куорат олохтоохторо өрөбүллэригэр айылҕаҕа тахсан сынньаналларыгар саҥаттан саҥа туристическай эбийиэктэр аһыллан иһэллэрэ олус үчүгэй!  

Ааптар хаартыскаҕа түһэриилэрэ.