Нэһилиэнньэлээх пууннары уу ыллаҕына, олохтоохтору эвакуациялыырга Хабаровскайтан авиация көмөҕө кэлиэҕэ. Муус харыытын дэлби тэптэрэргэ икки хамаанда, халаан уутун аһарарга уопсайа 113 оперативнай бөлөх үлэлиэҕэ.
Дакылааччыттары истэн баран, норуот дьокутааттара ыйытыктары биэрдилэр. Светлана Давыдова ааспыт сыллары кытта тэҥнээн көрдөххө, гидрометеорология билгэлээһиниттэн тугу күүтүөххэ сөбүн туһунан ыйыталаста.
Вячеслав Шехиров ыам ыйыгар гидрометеорологическай усулуобуйаттан муус ханна харыан сөбө биллэрин бэлиэтээтэ. Билигин эрдэттэн этэр уустук, өрүстэр эстэллэрин муус устар ортотугар этиэххэ сөп.
Александр Атласов гидротиэхиньиичэскэй тэрилгэ төһө үп көрүллүбүтүн, хас улуус куттала суох буолуу дэкэлэрээссийэтин барбытын интэриэһиргээтэ. Онуоха Андрей Коноплев өрөспүүбүлүкэҕэ 320 гидротиэхиньиичэскэй тэрил баарын, онтон 83-һэ бэйэни салайыныы уорганнарын бас билиитигэр баарын иһитиннэрдэ. 135 гидротиэхиньиичэскэй тэрил бас билээччитэ суох, 80-на куттала суох буолуу дэкэлэрээссийэтин барбатах. Кини 2025 с. үп көрүллүбэтэҕин, ол иһин гидротиэхиньиичэскэй тэриллэри көрөргө ороскуот харчытын судаарыстыбаннай бүддьүөккэ киллэрэр наадалааҕын биллэрдэ. Инженернэй уонна гидротиэхиньиичэскэй тэрил туругуттан нэһилиэнньэлээх пууннар көмүскэллэрэ тутулуктаах.
Алена Атласова халаан уутуттан өрөспүүбүлүкэҕэ улахан хоромньу тахсарын, быйыл өрүстэр сабаҕалаан көрүү болдьоҕор төһө сөп түбэһэн эстэллэрин, былырыын Нам улууһа туохтан сылтаан ууга барбытын, аны маннык быһыы-майгы хатыламматын туһугар туох үлэ ыытылларын сураста.
Вячеслав Шехиров Нам улууһугар Эҥсиэли хочотунан өрүс киэҥ сиринэн устарын, былырыын үөһэнэн көтөн иһэн көрдөххө, муус харыыта суоҕун бэлиэтээтэ. Ол эрэн түүн -2 С диэри тымныйа сылдьыбыт, элбэх арыылардаах, өрүс синньиир сиригэр муус хойуутук уста турбут. Халлаан тымныйан, бытархай муус мунньустан, уу атын сиринэн тахсар суолун көрдөөн, хаҥас диэки халыйбыт. Манна уу таһыма эбиллэн буолбакка, харыы тахсан, нэһилиэктэр ууга барбыттар. Быйыл харыы ханна тахсарын чуолкай этэр уустук, бу эмискэ буолар. Ону таһынан, халлаан эрдэ сылыйан, хаар ууллан, өрүскэ элбэх уу түһэрэ балаһыанньаны уустугурдар.
Андрей Николаев Сунтаар улууһугар Күүкэйгэ баһаар кэнниттэн Тумуллаах өрүс киртийбитин туһунан сайабылыанньаны СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэ аатыгар суруйан туттарбыттара хайдах быһаарыллыбытын ыйыталаста. Онуоха тустаах министиэристибэттэн хардарбыттарынан, Күүкэй уонна Кутана нэһилиэгин олохтоохторун кытта кэпсэтии кэнниттэн икки эспэртиисэ, симиэтэ оҥоһуллубут.
Түмүккэ СӨ Бырабыыталыстыбатын бэрэссэдээтэлин бастакы солбуйааччыта Дмитрий Садовников халаан уутун куттала суох аһарарга Ил Дархан таһымыгар мунньах буолбутун этэн туран, көрүллүбүт үп-харчы иһинэн үлэ ыытылларын, сорох учаастактар кутталы үөскэтэллэр эрээри, чуолкай сабаҕалаан көрүү билиҥҥитэ оҥоһулла илигин бэлиэтээтэ.
Василий Кононов хаартыскаҕа түһэриитэ.
-
0
-
1
-
0
-
0
-
0
-
0
