Саалаҕа көрөөччү тобус-толору муһунна, манна сахалар эрэ буолбакка, Москуба олохтоохторо кытта кэллилэр, ол иһигэр бочуоттаах ыалдьыттар. Киинэни устубут хамаанданы Судаарыстыбаннай Дуума дьокутаата Федот Тумусов, Москубаҕа РФ Бэрэсидьиэнин иһинэн СӨ Бастайааннай бэрэстэбиитэлин э.т. Мария Сафонова, Арассыыйа паралимпийскай кэмитиэтин отделын салайааччыта Екатерина Пронина эҕэрдэлээтилэр, махтал суруктары туттардылар.
Премьераны Арассыыйа киинэтин уонна тыйаатырын артыыската Татьяна Арнтгольц киэргэттэ, кини Настя тириэнньэрин оонньообута. "Диодорова. Сүүрүк утары" киинэни устубут режиссер Сандал Баишев Дьокуускайтан сүрүн оруоллары толорбут артыыстары - Ирина Никифорованы, Федот Львовы уонна Маша Иванованы кытта айаннаан кэллилэр.
Дьоро киэһэни колоритнай куоластаах олоҥхо тыйаатырын артыыската Анастасия Алексеева арыйда, оттон ыытааччы биллэр шоумен Эдуард Гаврильев – якут кими да чуҥкуппата. Киинэ кэнниттэн көрөөччүлэр ойон туран дохсун ытыс тыаһынан биһирээбиттэрин биллэрдилэр, сүрүн дьоруойдары Анастасия уонна Людмила Диодоровалары кытта хаартыскаҕа түстүлэр.
Көрөөччүлэр илиитэ суох кыыс успуорка чаҕылхай ситиһиитин көрөн, кини дьулуурун, тулуурун кэрэхсээн, кыайыыга кынаттанан тарҕастылар.
Саха Сиригэр "Диодорова. Сүүрүк утары" киинэ муус устар 17 күнүттэн тахсыаҕа.
Люба Готовцева хаартыскаҕа түһэриитэ.
-
2
-
1
-
0
-
0
-
0
-
0
