Күн бүгүн пассажирдар 20% субсидияламмыт билиэккэ тиксэллэр, ол даҕаны кэккэ уустуктардаах. Бу кыһалҕаны быһаарарга Ил Түмэҥҥэ ыытыллыбыт төгүрүк остуолга доруобайа харыстабылын сис кэмитиэтин бэрэссэдээтэлэ Светлана Давыдова бастатан туран, сүрэх-тымыр, искэн ыарыылаахтары, куоракка төрүү кэлэр дьахталлары субсидияламмыт билиэтинэн хааччыйарга этии киллэрдэ. Онтон ортоҕуна атыттар туһаныахтарын сөп.
Иван Данилов сырыы аайы бүддьүөттэн бэриллэр үбү кэтэһэн олорбокко, экэниэмиэкэ өттүнэн авиахампаанньа саҥа сайдар суолу-ииһи көрдөөн, айылҕа баайын хостуур хампаанньалары кытта дуогабардаһан үлэлиэн, эбии дохуот киллэриэн, ол үбүнэн билиэти субсидиялыан сөбүн эттэ.
Василий Николаев арҕаа улуустар: Өлүөхүмэ, Ленскэй, Мииринэй олохтоохторун кытта көрүстэххэ, дьон чугастыы Иркутскайга, Новосибирскайга эмтэнэ, оҕолорун үөрэттэрэ барарын, онно дьиэ атыылаһарын, устунан хааларын туһунан иһитиннэрдэ. Ити эҥээр олохтоохторо Дьокуускайга диэри билиэт сыаната ыараханыттан сылтаан, сорохтор Иркутскай уобаласка көһүөхтэрин баҕараллар эбит. Онон дьокутаат Аартыка олохтоохторо эрэ буолбакка, арҕаа улуустар эмиэ болҕомтону эрэйэллэрин бэлиэтээтэ.
Иван Лаптев видеосибээһинэн холбонон, Орто Халыматтан чугастыы Магадааҥҥа диэри сөмөлүөт быһа риэйсэтин арыйарга этии киллэрдэ. Магадаантан Москубаҕа диэри билиэт сыаната Дьокуускайдааҕар чэпчэкитин биллэрдэ.
Онон сыана чэпчээбэтэҕинэ, субсидиялаах билиэт дьоҥҥо тиксибэтэҕинэ, өрөспүүбүлүкэттэн көһөн барааччы элбиир кутталлаах. Хоту ыраах сиринэн тарҕаһан олорор бөһүөлэктэри сабан баран Аартыкаҕа биир үчүгэй куораты тутан биэрдэххэ, авиация, ОДьКХ, экэниэмикэ бары салаатын ороскуота аччыыр диэн хаһан эрэ эппиттэрин санаан кэллим.
Билиҥҥи туругунан, Аартыка улуустарыгар 60 000 пропискалаах киһиттэн дьиҥ чахчы 20 000-та эрэ олорор. Оттон өрөспүүбүлүкэ нэһилиэнньэтэ мөлүйүөнү куоһарда.
Хаартыска эрэдээксийэ архыыбыттан.
-
0
-
0
-
0
-
0
-
0
-
0
