Онон Нам улууһунааҕы ыксаллаах-быһыы майгы хамыыһыйата халаантан эмсэҕэлиир туруктаах нэһилиэктэргэ анал үөрэх ыытар. Маннык үөрэх Хатырык нэһилиэгэр ыытылынна. Ууга барыан сөптөөх 18 нэһилиэк исписэлиистэрэ, олохтоохторо кытыннылар.
Хас биирдии нэһилиэккэ хамыыһыйа олохтонно. Сылгы, сүөһү арыылартан көһөрүллэн уу түһүөр дылы анал хааһахха хаайыллыахтаах. Хатырык нэһилиэгэ хаһаайыстыбатын суоттанан 986 ынаҕы, 752 сылгыны, ону тэҥэ дьиэ кыылларын уу ылбат сиригэр көһөрөргө бэлэм.Ааспыт нэдиэлэҕэ буолбут өрөспүүбүлүкэтээҕи ыстаап мунньаҕар, быйыл Саха Сиригэр халаан уута ааһар кэмигэр эрэгийиэн таһымнаах ыксаллаах быһыы-майгы биллэриллиэн сөп
Саха Сиригэр өрүстэр арыллыылара нуорматтан 4-6 хонук эрдэлиирин сабаҕалыыллар. Хаар мунньуллуутунан уонна муус халыҥынан сылыктаатахха, эрэгийиэн таһымнаах ыксаллаах быһыы-майгы биллэриллиэн сөп диэн РФ ЫБММ Саха Сиринээҕи салаатын начаалынньыга Павел Гарин эттэ.
«Өлүөнэ эбэҕэ харыы Ленскэй, Өлүөхүмэ, Хаҥалас, Дьокуускай аттыгар, Нам уонна Кэбээйи оройуоттарыгар тахсыан сөп. Маны сэргэ Алдан, Амма уонна Халыма өрүстэргэ Уус-Майаҕа, Аммаҕа, Үөһээ Халымаҕа, Орто Халымаҕа. Муҥутуур таһым борогунуос бэлиэтиттэн 1,0 — 2,0 м сабардаан, кутталлаах бэлиэни аһардыан, чугас сытар нэһилиэнньэлээх пууннары уу ылыан сөп. Харыы ыам ыйынааҕы гидрометеорологическай усулуобуйаттан чопчуланар», — диэтэ Павел Гарин.
Санатар буоллахха, былырыын 2024 сыл Саха Сиригэр сааскы халаан уутуттан эмсэҕэлээбиттэргэ уопсайа 252 мөл солк үп уонна матырыйаалынай көмө быһыытынан ыытыллыбыта. «Госуслуги» порталга 9 тыһыынчаттан тахса сайабылыанньа киирбитэ, өҥө 5600 киһиэхэ оҥоһулубута.
Эрэгийиэн бырабыыталыстыбата бэлиэтээбитинэн, 5600 киһиттэн 2400 киһи үбүнэн көмө ылбыта, уопсай суумата 220 мөл солк, 3200 киһи биир кэмнээх матырыйалынай көмө тупута, уопсай суумата 32 мөл солк. Тахсыбыт хоромньу 2,4 млрд солк буолбута.
Олорор дьиэлэргэ испииһэги чуолкайдааннар, эспэртииссэ түмүгүнэн, чөлүгэр түһэриллэр кыаҕа суох буолбут дьиэлэр оннуларыгар саҥа дьиэҕэ үбүлээһин көрүллэн, оттон алдьаммыт дьиэлээх бас билээччилэргэ — өрөмүөн ыытыллыбыта.
Санаттахха, сааскы халаан уутуттан Нам, Өлүөхүмэ, Ньурба улуустарыгар 27 нэһилиэнньэлээх пуун эмсэҕэлээбитэ, улахан хоромньу тахсыбыта.
Хаартыска: РИА Новости / Андрей Сорокин.
-
0
-
0
-
0
-
0
-
0
-
0
