Василий Васильеви Никифоров - Күлүмнүүр -өрөспүүбүлүкэ улуус салайааччыларын плеядатын биир уһулуччулах бэрэстэбиитэлэ, саха норуотун култууратын уонна үөрэҕин сайдыытыгар улахан кылааты киллэрбит киһи. Кини оччотооҕу кэмҥэ суолталаах үгүс уоспастыбаннай, култуурунай уонна сырдатар уопсастыбалары, холбоһуктары тэрийээччи, салайааччы. Ураты айар суоллаах-иистээх чаҕылхай публицист, сахаттан бастакы литературнай диэйэтэл, суруйааччы, тылбаасчыт, драматург.
Үөрүүлээх тэрээһин Саха Өрөспүүбүлүкэтин экэниэмиэкэҕэ миниистирэ Петр Попов тыл этиитинэн саҕаланна.
- Биһиги сыллата бу күн өрөспүүбүлүкэ туһугар олохторун толук биэрбит улуу дьоммутун ахтан-санаан ааһабыт. Биир оннук улуу убайбытынан Баһылай Никиииппэрэп - Күлүмнүүр буолар. Кини аата сэбиэскэй кэмҥэ өр сылларга туоратылла сылдьыбыта. Баһылай Баһылайабыс үтүө аатын суруйааччы, суруналыыс Ираида Клиорина реабилитациялаан норуотугар төнүннэрбитэ.
Биһиги Күлүмнүүрү кытта бииргэ турууласпыт улуу дьоммут Былатыан Ойуунускай, Максим Аммосов, Исидор Бараахап, Степан Аржаков чаҕылхай ааттарын үүнэр көлүөнэҕэ тириэрдэн иһэр ытык иэспитинэн буолар.
Сахабыт Сирэ үүнэ-сайда, чэчирии турдун!, - диэн Петр Петрович эҕэрдэлээтэ.
Ил Түмэн cир сыһыаннаһыыларыгар, айылҕа ресурсаларыгар уонна экологияҕа сис кэмитиэтин бэрэссэдээтэлэ Андрей Находкин тыл этиитигэр бу күн аптаныамыйаны ылыныы уонна төрүт сокуон бигэргэммит ураты суолталаах күнүнэн буоларын санатта.
- Билигин үлэлии сылдьар дьон, ыччаттар улуу убайдарбыт сырдык ааттарыгар, пааматынньыктарыгар кэлэн махтал тылларын этэр, сүгүрүйэр, сибэкки дьөрбөтүн уурар ытык, бэлиэ күммүт.
Баһылай Никииппэрэп -Күлүмнүүр бэйэтин кэмигэр биир соруктаах турууласпыт дьоннорбутун кытары бииргэ буолан саха дьонун уһугуннарбыт, олохтоох интэллигиэнсийэни бэйэтин тула түмпүт, Саха Сирэ, саха норуота бэйэтин салайыныан, дьаһанан үүнүөн-сайдыан сөбүн туһунан санааны сахпыт улуу киһибитинэн буолар.
Кини аата өр сылларга туора тутулла сылдьыбыта. Кини кэминээҕи турууласпыт дьоммут олус уустук, ыарахан дьылҕаламмыттара. Ааспыт үйэ 20-с сыллардааҕы бас-көс дьоммут үксүлэрэ даҕаны толору олоҕу олорботохторо - ылыммыт ыра санааларын толорор, дьыала иһин олохторун толук уурбуттара, -диэн билигин кинилэр ааттарын үйэтитэр, харыстыыр уонна кэлэр көлүөнэҕэ тириэрдэр ытык иэс буоларын бэлиэтээтэ.
Салгыы бырааһынньыктыы тэрээһиҥҥэ тыл эппит Ыччат парламенын бэрэссэдээтэлэ Антон Васильев уонна Анал байыаннай дьайыы кыттыылааҕа, Эр санааланыы уордьан, «Хорсунун иһин» мэтээл наҕараадалардаах, «Якутдорстрой» АУо генеральнай дириэктэрин бастакы солбуйааччы Иннокентий Колодезников улуу дьоннорбут эдэр ыччакка суолдьут сулус буолан куруук сырдыкка, үрдүккэ, үйэлээххэ сирдиэхтэрэ, кинилэр ааттара умунуолла суоҕа диэн кэс тылларын эттилэр.Кинилэр бары эдэр көлүөнэ ыччат санаатын өрө тутан, саха норуотун чулуу уолаттарын суолларын дьоһуннаахтык салҕыылларыгар баҕа санааларын эттилэр.
Тапталлаах өрөспүүбүлүкэбит күнүн долгутуулаах бэлиэ тэрээһинигэр - Баһылай Никииппэрэп- Күлүмнүүр пааматынньыгар сибэккини уурууга Саха Өрөспүүбүлүкэтин Судаарыстабаннай мунньаҕын (Ил Түмэн) бэрэссэдээтэлин бастакы солбуйааччы Александр Жирков, сис кэмитиэттэр бэрэссэдээтэллэрэ, норуот дьокутааттара кытыннылар. Ону таһынан СӨ Бырабыыталыстыбатыттан, өрөспүүбүлүкэтээҕи тэрилтэлэртэн, уопсастыбалартан, Уус Алдан улууһун дьаһалтатыттан, улуус түмсүүтүттэн бэрэстэбиитэллэр, аймахтара сүгүрүйэллэрин бэлиэтээн сибэкки уурдулар.
Хаартыска: Алексей Матвеев
-
3
-
0
-
0
-
0
-
0
-
0
