Чэпчэтиинэн туһанар дьон ахсаанын өссө кэҥэтэргэ, ону сөптөөх докумуоҥҥа киллэрэр туһунан ааспыт нэдиэлэҕэ Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэтин мунньаҕар дьүүллэстилэр. Мунньаҕы сис кэмитиэт бэрэссэдээтэлэ Павел Петров саҕалаата, кини араас кыһалҕалаах, балыыһаҕа киирэр дьон чэпчэтиинэн туһаныахтаахтарын туһунан эттэ.
Бастатан туран, Аҕа дойдуну көмүскүүр сэрии бэтэрээннэрэ, Анал байыаннай дьайыы кыттыылаахтара босхо айанныыллар. Ону таһынан, норуот дьокутаата киһи олоҕун быыһыырга, суһал көмөнү оҥорорго наадыйар ыарыһахтар, элбэх оҕолоох ыаллар, инбэлииттэр, биэнсийэлээх дьон чэпчэтиинэн туһаныахтаахтарын туруорсарын тириэртэ.
СӨ Тырааныспарга уонна суол хаһаайыстыбатыгар миниистирэ Владимир Сивцев Дьокуускайтан Аллараа Бэстээххэ диэри 30-ча суудуна, хивус, аэробот, Кангалааска диэри 3 суудуна, Хачыкаат — Мохсоҕоллоох икки ардыгар 2 суудуна сылдьыахтара, Хаандыгаҕа, Аммаҕа, Бүлүүгэ эмиэ дьону уҥуор биэрэккэ туоратыахтара диэн эттэ.
Миниистир, бастатан туран, дьон куттала суох айанын хааччыйарга болҕомто уурулларын санатта, муус хойуутук, дохсуннук барар кэмигэр аэроботтар, МИ-8 МТВ бөртөлүөттэр тахсаллар. Улахан ыксал тирээтэҕинэ, көтөр аал Маҕантан Бэстээххэ диэри дьону таһар. Бөртөлүөт билиэтэ 6800 солк., чэпчэтиилээх тарыып эмиэ баар эрээри, манан туһанар дьон ахсаана аҕыйах.
Хаартыска СИА,
-
0
-
0
-
0
-
0
-
0
-
0
