Киинэ ис хоһоонун билиһиннэрдэххэ, Москубаҕа үөрэнэр устудьуоннар Анал байыаннай дьайыы буойуннарыгар гуманитарнай көмө илдьэ баран иһэн дэлби тэптэриигэ түбэһэн, олохтон соһумардык эдэр саастарыгар туорууллар. Дьокуускайдааҕы IT-паарка дириэктэрэ Спиридон Дьяконов ол быһылааҥҥа собус соҕотох оҕотун, тапталлаах кыыһын сүтэрэр.
Аатырбыт «Бригада» сериалга оонньообут Космос (Дмитрий Дюжев) Шатун диэн ааттаах батальон хамандыырын оруолун толорор. Дьиҥэр, кинини бултаһан ракета ыыппыттара, гражданскай дьоҥҥо, устудьуоннарга түбэһэр.
Кыыс аҕата бэрт түргэнник хомунан, олоҕун үгэнигэр сылдьар 40-чалаах эдэрчи киһи Дьокуускайтан Анал байыаннай дьайыыга баҕа өттүнэн барар. Ыар сүтүктээх аҕа кыыһын өлөрүөхсүттэрин суолларын ирдэһэн, бирикээс биэрбит уонна ону толорбут дьону булан иэстэһиэн баҕарар.
Анал байыаннай дьайыыга тиийэн биир дойдулаахтарын көрсөр, онно баһыырбыт табаарыстарын кыргыһыы хонуутуттан таһааран истэхтэринэ эмискэ буомба эстэн, Спиридон Дьяконов хас да хонук өлөр-тиллэр икки ардыгар сытан, дьон истибэтин истэр, билбэтин билэр, ыраахтан сэрэйэр дьоҕура аһыллар.
Кыыһын сырдык тыыныгар турбут дьону булан, иэстэһэр баҕата сүрэҕин түгэҕэр чох курдук умайа сылдьар эрээри, өстөөҕүн кырачаан кыыһын аһынан, оҕо ис уорганын донор оҥостоору эпэрээссийэлээри турдахтарына былдьаан ылан куотан хаалар. Оҕо төгүрүк тулаайах хаалбытын кэнниттэн кыыһы мин оҕом диир.
Бу киинэ Анал байыаннай дьайыыны бастакынан көрдөрдө, киинэҕэ Ил Дархан Айсен Николаев илэ бэйэтинэн көһүннэ, Саха Сирин IT үлэһиттэрин бырайыактарын өйүүрүн көрдөрдө. «Алдан» киинэ дойду Бэрэсидьиэнэ Владимир Путин өйөбүлүнэн таҕыста. Ол туһунан бэҕэһээ киинэ премьератыгар режиссер Дмитрий Кольцов билиһиннэрдэ. Бу иннинэ кини «Рядовой Чээрин» киинэни устубута.
СӨ Бырабыыталыстыбатын бэрэссэдээтэлин солбуйааччы Анатолий Семенов бу бырайыагы улахан хамаанда, өрөспүүбүлүкэ уонна Запорожскай уобалас, байыаннай кэрэспэдьиэннэр кыттыһан оҥорбуттарын туһунан иһитиннэрдэ. Кини маннык уустук кэмҥэ дьоруойдарбытын көрдөрүөх, үйэтитиэх тустаахпытын тириэртэ.
Манна даҕатан эттэххэ, киинэҕэ Анал байыаннай дьайыыга аатырбыт «Алеша» тааҥка хорсун быһыыта эмиэ көстөр. Анатолий Семенов саха быһаҕын уонна махтал суругу киинэ продюсерыгар Данил Куликовка уонна биллэр артыыска Дмитрий Дюжевка дохсун ытыс тыаһыгар доҕуһуоллатан туттарда.
Премьераҕа айар бөлөх киинэни хайдах устубуттарын туһунан кэпсээтэ. Артыыс Дмитрий Дюжев сыанаҕа тахсан истиҥ мичээрин бэлэхтээн, сахалыы махтал диэбитигэр дьон астынан ытыстарын харыстаабакка таһыннылар.
«Саха Сирин олохтоохторо айылҕаттан ураты талааннаах дьон, бэйэҕит киинэҕитин устан улахан экраҥҥа таһаараҕыт, киинэҕэ сөбүлээн сылдьаҕыт, онон эһигини атын уобаластарга уонна өрөспүүбүлүкэлэргэ холобур оҥостобун. Эһиги бастыҥнар кэккэлэригэр сылдьаҕыт. Саха киһитин майгытын туһунан элбэҕи истэн турабын, эһиги туруоруммут сыалгытын сатаан ситиһэҕит, иннигит диэки күрдьэн иһэҕит. Онтон бу киинэҕэ батальон хамандыырын оруолун хайдах толорбуппун көрөөччүлэр, эһиги сыаналыаххыт», — диэтэ Дмитрий Дюжев.
Онон сүүстэ истибиттээҕэр биирдэ көрбүт ордук, «Алдан» киинэ Саха Сирин бары киинэ тыйаатырдарыгар таҕыста.
Ааптар хаартыскаҕа түһэриитэ.
-
0
-
0
-
0
-
0
-
0
-
1
