Ааспыт, 2024 сыллаахха Волгоградтааҕы «Гвардеец» көрдүүр этэрээт уонна Самаратааҕы Судаарыстыбаннай социальнай-педагогическай үнүбэрсиэт устудьуоннарын «Феникс» патриотическай холбоһуга Волгоград уобалаһын Городищенскай оройуонугар, Герой-куорат Сталинградтан ырааҕа суох сиргэ, Хаҥалас улууһуттан төрүттээх биир дойдулаахпыт, кыһыл армеец Илья Дмитриевич Алексеев уҥуоҕун кырамталарын уонна тус малларын булбуттара.
Илья Алексеев 14 сааһыгар дылы дойдутугар Хаҥалас I Малдьаҕар нэһилиэгэр олорбута биллэр. Аҕа дойду Улуу сэриитигэр 1942 сыллаахха бэс ыйын 19 күнүгэр 29 саастааҕар II Дьөппөҥҥө олорон Кыһыл Аармыйа кэккэтигэр ыҥырыллыбыт. Кини сэрии иннинэ Орджоникидзевскайдааҕы райисполком дьокутаата эбит.
Аҕа дойду Улуу сэриитигэр 83 сыл анараа өттүгэр Сталинград анныгар улахан хаан тохтуулаах, кырыктаах кыргыһыыларга хорсуннук сэриилэһэ сылдьан геройдуу охтубут буойун И.Д. Алексеев докумуоннарын (депутатскай дастабырыанньатын, байыас киниискэтин уонна хас да манньыаттаах портмонетын) уонна уҥуоҕун кырамтатын биэрии сиэрин толорууга Городищенскайдааҕы историяны уонна кыраайы үөрэтэр түмэлгэ I Малдьаҕар нэһилиэгин баһылыга Айталина Васильева уонна дьоруой хос сиэнэ Ньургуяна Хаптасова кыттыыны ылбыттара.
Буойун И.Д. Алексеев уҥуоҕун кырамталарын Волгоград уобалаһын Кузьмичевскай оройуонуттан аҕалан, ыам ыйын 4 күнүгэр, дойдутугар Булгунньахтаахха Таҥара дьиэтигэр аҕабыыт ийэ буорун булларар, тиһэх суолугар атаарар сиэрин-туомун толордо. Бочуоттаах карауллардаах, салют ытан чиэстээн-бочуоттаан саллааты ийэ буоругар кистээтилэр. Биир дойдулаах дьоруойбутун аҕалан маннык харайыы көлүөнэлэр быстыспат ситимнэринэн уонна өбүгэлэрбит хорсун быһыыларын туһунан биһиги уопсай өйдөбүнньүкпүт буолар. Илья Алексеев аймахтара, 50-ча киһи, бу олус улахан тэрээһиҥҥэ, көрдүүр этэрээттэргэ уонна өрөспүүбүлүкэ салалтатыгар дьоһуннаах кылааттарын, көмөлөрүн иһин дириҥник махтаналлар.
Уйбаан УЙГУУРАП,
хаартыскаҕа түһэриитэ
-
0
-
0
-
0
-
0
-
0
-
0
