Дьокуускай олохтоохторо нэдиэлэтээҕи астарын мантан булаллар, бэл улуустар кытта «Хайс» микрооптуобуһунан кэлэн тиэнэн бараллар. Атыыһыттар куруук атыылаһар дьону билэллэр, онон өссө чэпчэкигэ биэрэллэр, элбэҕи атыыластаххына, чэйгэ лимон, эбэтэр атын фруктаны бэлэхтииллэр, өссө уу сахалыы саҥараллар.
Ол эрэн хомойуох иһин, иллэрээ хонуктааҕыта бүтүн куораты, улуустары сибиэһэй фруктанан, оҕуруот аһынан хааччыйа олорбут бааза бэйэтэ даҕаны эбис-эргэ, самнархай хаарбах дьиэтэ биирдэ умайан күлүбүрээн, күл-көмөр эрэ хаалла.
Атыыһыттартан ыйыталастахха, кафе иһигэр гаас боллуона эстэн, уот онтон барбыт, бэйэлэрэ нэһиилэ куотан тахсыбыттар. Умайбыт хаарбах дьиэни салгыы өрөмүөннээн баран үлэлиэхпит дэһэллэр.
Оҕуруот аһын, фруктаны атыылыыр Орто Азияттан кэлбит оскуоланы саҥа бүтэрбит эп-эдэркээн уолаттар кыһыннары-сайыннары эбис-эргэ, тыбыс-тымныы сытыйан эрэр былыргы мас дьиэҕэ туран үлэлииллэрэ. Фрукта сөрүүн сиргэ туруохтаах, ол иһин манна сайыннары куруук тымныы, эгэ кыһын -50-56С хара сарсыардаттан киэһэ хойукка диэри туран төһө эрэ тоҥоллор.
Куорат, улуус дьоно бары мантан аһыыбыт эрээри, тоҕо киһилии оҕуруот аһын, фруктаны харайар холодильниктаах, саҥа ыраас киэҥ-куоҥ ырыынагы туппаттара буолуой? Оттон Бааһынай уонна Крытай ырыынакка сыана Труда баазатын кытта тэҥнээтэххэ, быдан ыарахан.
Ааптар хаартыскаҕа түһэриитэ.
-
0
-
0
-
0
-
0
-
1
-
0
