2020 с. Ил Дархан Айсен Николаев ыйааҕынан өрөспүүбүлүкэҕэ аан бастаан Национальнай бэчээт күнэ бэлиэтэммитэ. Ил Түмэн бэрэссэдээтэлин бастакы солбуйааччы Александр Жирков, СӨ Инновацияҕа, сыыппара сайдыытыгар уонна инфокоммуникационнай технологияҕа миниистир Василий Ефимов, "Сахамедиа" генеральнай дириэктэрин солбуйааччы Чокуур Гаврильев уонна сонуннары киэҥ эйгэҕэ тарҕатар ситим, кинигэ кыһатын үлэһиттэрэ, Күлүмнүүр аймахтара бүгүн Василий Никифоров Күлүмнүүр пааматынньыгар сүгүрүйэн туран сибэкки дьөрбөтүн уурдулар.
Александр Жирков саха бастакы хаһыатын таһаарыы улахан мэһэйдэри туораан туран тахсыбытын, бу хаһыаты таһаарыыга кыттыспыт дьон үксүлэрэ 1930-ус сыллаах репрессияны кыайан туораабатахтарын бэлиэтээтэ.
Кини бу хаһыаты адьас даҕаны билиммэт буола сатааһын баар этэ даҕаны, сүүһүнэн экземплярынан тахсыбыты хайдах даҕаны күүһүнэн сабар кыахтара суоҕун аҕынна. Күлүмнүүр бөлөҕө сыл аҥаарыгар икки хаһыаты «Саха дойдутун», «Саха олоҕун» таһаарбыта. Дьоннорун сууттууллар-хаайаллар, оттон хаһыат тахса турара.
«1913 с. «Саха саҥата» диэн билиҥҥи «Чолбоннооҕор» халыҥ сурунаалы таһаарбыттара. Итинник саха суруналыыстыката үөскээн, саха классик суруйааччылара Өксөкүлээх Өлөксөй, Алампа о.д.а. бастакы айымньыларын бэчээттээбиттэрэ.
Василий Никифоров Күлүмнүүр 21 сааһыгар ыал буолбута, онтон субуруччу уол-кыыс оҕоломмуттара, 24 сааһыгар Дүпсүн улууһун кулубатынан талыллыбыта, 25-гэр Иркутскайга цесаревич Николай Александровичка приемҥа киирэ сылдьыбыта. Николай II аҕыйах сылынан Арассыыйа ыраахтааҕыта буолбута. Күлүмнүүр отуччалаах уол императортан икки мэтээли ылбыта.
1903 с. саха норуота бэйэтин бэйэтэ салайынар кыаҕын толору туһаныах тустаах диэн туруорсан, онтон ыла былаас кинини өрө тутара бүппүтэ, ыраахтааҕы Арассыыйаҕа, Сэбиэскэй былааска даҕаны хаайыыга олорбута. Бүтэһик тыына быстыар диэри норуотун туһугар турууласпыт санаатын булгуруппатаҕа», — диэн устуоруйа чахчытын сэгэттэ Александр Жирков.
Кини саха бэйэтэ хаһыаттаммыт, сурунаалламмыт, саха бэчээтэ тэриллибит күнүнэн бу эйгэҕэ үлэлии сылдьар дьону, бэтэрээннэри эҕэрдэлээтэ.
Ааптар хаартыскаҕа түһэриитэ.
-
1
-
0
-
0
-
0
-
0
-
0
