Ил Дархан, Бырабыыталыстыба дьаһалтатын салайааччы Георгий Михайлов иһитиннэрбитинэн күн бүгүн Саха Сиригэр маассабай информацияны тарҕатар 202 сириэстибэ баар. Өрөспүүбүлүкэ уонна улуус хаһыаттарын уопсай тиражтара 53 000 экземпляр.
Куйаар ситимэ күүскэ сайдан сонун хаһыакка түргэнник эргэрэр, ол иһин суруналыыстар дьону толкуйдатар ырытыыларга, аналитическай матырыйаалларга болҕомтолорун уураллар. Ону таһынан, төрөөбүт төрүт тылбытын харыстыырга, кэнэҕэс көлүөнэҕэ сахабыт тылын сүөгэйин-сүмэтин тиэрдэргэ дьоһун кылааттарын киллэрэллэр.
Күн бүгүн 84 саайт саха уонна хотугу аҕыйах ахсааннаах норуоттар тылларынан тахсар. «Саха» НКИК оҕолорго «Тооку» ханаалы таһаарда. «Саха Сирэ» саайты ыйга 1 мөл. тахса ааҕааччы киирэн көрөн, саамай ааҕыллар таһаарыы буолла, ЯСИА, «УлусМедиа» эмиэ инники кирбиигэ сылдьаллар.
Байыаннай кэрэспэдьиэннэр Анал байыаннай дьайыыга хаста даҕаны командировкаҕа баран кэлэллэр, биһиги уолаттарбыт кыайыыга дьулуурдарын тиһигин быспакка сырдаталлар, эдэр ыччаты Аҕа дойдуга бэриниилээх буоларга уһуйаллар.
Күлүмнүүр аатынан Судаарыстыбаннай бириэмийэни Саха араадьыйатын дириэктэригэр, байыаннай кэрэспэдьиэҥҥэ Николай Бястиновка туттардылар. Амма Аччыгыйын аатынан Ил Дархан бириэмийэтин Римма Корякина, Үтүөлээх суруналыыс аатын «Аар тайҕа» хаһыат эрэдээктэрэ Геннадий Бечеряков ылла, ону таһынан суруналыыстары Ил Дархан, Бырабыыталыстыба Бочуоттаах грамоталарынан, Махтал суруктарынан наҕараадалаатылар.
Галина Бочкарева хаартыскаҕа түһэриитэ.
-
3
-
0
-
0
-
0
-
0
-
0
