Үп-харчы эйгэтигэр билиилээх буоларга үөрэтэр эрэгийиэннээҕи компетенция киинэ Дьокуускайдааҕы үп-экэниэмикэ кэллиэһин иһинэн, СӨ Үбүн министиэристибэтин өйөбүлүнэн 2021 с. тэриллибитэ. Салайааччынан Татьяна Борисова үлэлиир. Кинилэр уһуйаан оҕолоруттан саҕалаан, аҕам саастаах дьоҥҥо тиийэ үбү-харчыны хайдах сөпкө туттарга үөрэтэллэр. Оскуолалары, интэринээттэри кэрийэ сылдьан лиэксийэ, оонньуу ыыталлар.
Уопсайа түөрт үлэһиттээхтэр, ону таһынан 100 тахса волонтердар көмөлөһөллөр. Волонтердар ортолоругар оскуола оҕолоро, устудьуоннар, үп-харчы эйгэтин үлэһиттэрэ, учууталлар-уһуйааччылар бааллар. Былырыын кинилэр көмөлөрүнэн 170-ча араас тэрээһин ыытыллыбыта. 2023 сыллаахтан «Үп-харчы эспириэһэ” диэн бэртээхэй бырайыактаахтар. Улуустарга хоту сөмөлүөтүнэн, соҕуруу пуойаһынан сылдьан, маастар-кылааһы, сэминээри ыыталлар, олохтоохтору кытта сирэй көрсөн, атах тэпсэн олорон үбү-харчыны албыннаан ыла сатыыр түөкүттэртэн сэрэхтээх буоларга үөрэтэллэр.
Маны таһынан, баантан кирэдьиити ылан хайдах түргэнник төлөөн бүтэрэргэ, ыарахан балаһыанньаттан тахсарга, үбү мунньунарга сүбэ-ама биэрэллэр, дойду үп-харчы өртүнэн хайдах сайдан иһэрин кэпсииллэр.
Хаартыска Татьяна Борисова архыыбыттан.
-
0
-
0
-
0
-
0
-
0
-
0
