Бэс ыйын 21 күнүгэр күрэх эрэгийиэннээҕи түһүмэҕэр алта ыал күөн көрсөн Мэҥэ Хаҥаластан Павловтар бастаатылар, иккис миэстэни Усуйаанаттан Юдиннар, үсүһү Чурапчыттан Седалищевтар ыллылар. Дьиэ кэргэттэр бары сахалыы таҥнан кэлбиттэрэ көрүөххэ олус үчүгэй. Бастаабыт ыал куорат таһыгар туристическай сынньанар дьиэҕэ путевканан наҕараадаламмыта, атыттар сэртипикээт уонна өйдөбүнньүк бириистэри ылбыттара. Ыраах сиртэн Усуйаанаттан кэлбит ыал анал бэлэх туппуттара.
Кыттааччылар дьиэтээҕи сорудаҕы толордулар, тургутук ыйытыктарыгар эппиэттээтилэр, литературнай айымньыга үпкэ-харчыга сыһыаннаах дьоруойу көрдөөтүлэр, садаачаны суоттаатылар, оонньууга холоннулар.
Кыайбыт дьон балаҕан ыйыгар Москубаҕа бүтүн Арассыыйатааҕы бэстибээл түмүктүүр биэтэгэр Саха Сирин көмүскүү барыахтара. Кинилэр айаннарын ороскуота, түһэр сирдэрэ барыта эрэгийиэннээҕи киин нөҥүө төлөнөр.
Компетенция киинин үлэһиттэрэ сайыҥҥы оҕо лааҕырдарыгар, кырдьаҕастар дьиэлэригэр сылдьан, түөкүттэр албыннарыгар киирэн биэрбэт буоларга сэрэтии үлэтин ыыталлар.
Хаартыска Татьяна Борисова архыыбыттан.
-
0
-
0
-
0
-
0
-
0
-
0
