Уопсастыба

Оскуолаҕа бизнес-инкубатордар үлэлииллэр, онно үөрэнээччилэр араас бырайыактары толкуйдаан олоххо киллэрэллэр. Олорор куораттарыгар, нэһилиэктэригэр туох-ханнык өҥө суоҕун көрөн, онон сирдэтэн, маркетинговай чинчийиини ыыталлар. Салгыы гыраан ыларга күрэхтэһэн, маннык тэрээһиннэргэ кыттан, бу харчыны оҥосторго үөрэнэллэр. Биллэн турар, киһи барыта сатабыллаах урбаанньыт, эргиэмсик буолбат. Айылҕаттан итиннэ дьоҕурдаах оҕолор эрдэттэн биллэллэр.

«Билигин оскуолаҕа оҕолор көҕүлээһиннэринэн туттуллар бүддьүөт харчыта диэн баар буолбута үһүс сылыгар барда. Өрөспүүбүлүкэ оскуолаҕа харчы биэрэр, холобур, 300 000 солк. Оскуола оҕолоро хамаанда тэринэн, бэйэлэрэ бырайыак суруйаллар, ону тургутан көрөн үөрэнээччилэр ханныгы сөбүлээбиттэрин талан ылан, ол бырайыакка куоластыыллар.

Кыайбыт бырайыак көрүллүбүт бүддьүөт харчытын ылан, оскуола тиэргэнин тупсарыан, сынньалаҥ хоһу оҥоруон сөп. Холобур, оҕолор таҥастарын угар ыскаап, радиорубка оҥостубуттара. Өҥөнү оҥорооччуну эмиэ бэйэлэрэ булан кэпсэтэллэр. Маннык бачыым оҕону олоххо бэлэмниир, урбааҥҥа бастакы хардыыларын оҥорорго уһуйар», — диэн санаатын үллэстэр бүгүҥҥү сэһэргэһээччим.

Татьяна Иннокентьевна этэринэн, харчыны сөпкө туттарга оҕону кыра сааһыттан үөрэтиэххэ наада. Кини үлэлээтэххэ харчы хайдах кэлэрин, сыаннаһын билиэхтээх. Күн бүгүн оскуола улахан кылааһын оҕото биэс сиртэн дохуот ылар кыахтаах: күннээҕи туттарыгар дьоно биэрэллэр, бэлиэ күнүгэр бэлэх тутуон сөп, эбии үлэлээн харчыны аахсар, куонкуруска, успуорка кыттан өйүнэн, кыаҕынан, бириис ылар, эбэтэр бэйэтин дьоҕурунан тугу эмит оҥорон таһааран, ону атыылаан үп-харчы киллэринэр кыахтаах.

Оҕоҕо кыралаан хайаан даҕаны харчыны биэриэххэ наада. Кини ону ааҕа үөрэнэн, устудьуоннуу бардаҕына төрөппүттэрэ ыыттахтарына биирдэ туттан кэбиспэт, күннээҕи ороскуотун сөпкө ааҕынар, харыстыыр буолар.

Хас биирдии ыал харчы мунньунар копилкалаах буолааччы эрээри, билигин уу харчынан туттубат буоламмыт, ол ньыматтан тэйдибит диэххэ сөп. Оҕо тугу атыылаһыан баҕарарыттан көрөн сыал-сорук туруорунуохтаах, холобур, саҥа кроссовка ылар дуу, сыаналаах төлөпүөҥҥэ, айфоҥҥа мунньар дуу. Саҥа тэлэбииһэр, таҥас ыларга дьиэ кэргэҥҥэ биир копилка баар буолуохтаах, онно бары харчы угаллар, мунньаллар. Уопсай сыал дьиэ кэргэни түмэр, малы сыаналыырга үөрэтэр.

Хаартыска Татьяна Борисова архыыбыттан.