«Сорох оҕо бииргэ үөрэнэр табаарыһыгар сыаналаах айфон ылан биэрдэхтэринэ миэхэ тоҕо суоҕуй диэн санаарҕыыр, маннык түгэҥҥэ оҕоҕо быһааран биэриэхтээхпит, хамнастан хамнаска олорбокко эбии үлэлээн, бары бииргэ харчы оҥоруохха сөп диэн. Холобур, ас астаан, иистэнэн дьаарбаҥкаҕа кыттан, эбэтэр ийэлэрэ иккис үлэни булар кэмигэр улахан оҕолор кыралары көрөллөр, дьиэ үлэтигэр төрөппүттэригэр көмөлөһөллөр.
Дьыбааҥҥа сыттаххына харчы халлаантан түспэтэ биллэр, онон оҕолор кыра саастарыттан үлэлии үөрэниэхтээхтэр. Оччоҕуна эрэ ымсыырбыттарын ылаллар диэн өйдүөхтээхтэр. Холобур, оҕо кыралары көрөн, киэһээҥҥи аһы буһаран, төрөппүттэрэ иккис-үһүс үлэҕэ үлэлииллэригэр усулуобуйа оҥорор. Оҕоҕо хаһан даҕаны харчыбыт суох, тиийбэт диэн өйдөбүлү олохсуппакка, эбии үлэлии, ороскуоту сөпкө ааҕынарга үөрэттэххэ, кини толкуйдуур дьоҕура аһыллар», — диэн сүбэлиир Үп-харчы эйгэтигэр билиилээх буоларга үөрэтэр эрэгийиэннээҕи компетенция киинин салайааччыта Татьяна Борисова.
Дьиэ кэргэнинэн, оҕолор эмиэ күннээҕи, ыйдааҕы ороскуоттарын, тугу атыыласпыттарын суруна сылдьыахтаахтар. Онлайн-бааны туһанан, ону бэлиэтэнэр туох да уустуга суох. Холобур, үс ый сурунан баран ороскуоттаргын көрөҕүн, улахан наадата суохтары көҕүрэтэҕин, үлэлээн, эбии дохуот киллэринэҕин. Оччоҕуна харчы мунньуллан иһэр, ону элбэтэргэ эмиэ кыһаллыахха сөп. Оҕо тугу атыыласпытын бэлиэтэнэн иһэн, харчыны харыстаан туттарга үөрэнэр.
Үөрэх үлэһиттэрэ этэллэринэн, төрөппүттэр улахан ороскуоттарын оҕолоругар кэпсиэхтээхтэр, холобур, эһиил массыына ылабыт, эбэтэр уоппускаҕа сынньана барабыт диэн. Оччоҕуна оҕолор харчыны харыстаан тутталлар, маҕаһыыҥҥа көрбүттэрин барытын ыллара сатаабаттар.
Ойуу Татьяна Борисова архыыбыттан.
-
0
-
0
-
0
-
0
-
0
-
0
