Кинематографистары түмэр бэстибээл аһыллыытын сиэригэр-туомугар СӨ Бырабыыталыстыбатын бэрэссэдээтэлэ Кирилл Бычков инникитин аан дойду таһымнаах саҥа бырайыактар, коллобарациялар тахсан иһиэхтэрэ диэн эрэлин биллэрдэ.
Арассыыйа норуодунай артыыһа, ССРС, Арассыыйа, Саха Сирэ судаарыстыбаннай бириэмийэтин лауреата, Олоҥхо тыйаатырын төрүттээччи Андрей Борисов дьүүллүүр сүбэ бэрэссэдээтэлэ, биллэр киинэ критигэ Дали Окропиридзе күннээх Грузияттан кэлбитин иһитиннэрдэ.
«Хаһан эрэ грузиннар «Хаарыан хампа күөх кытылым» испиктээги ССРС судаарыстыбаннай бириэмийэтигэр киллэрэннэр, кинилэр үтүө өҥөлөрүнэн Саха тыйаатыра тутуллубута. Ол иһин Дьокуускайга буолар киинэ бэстибээлин дьүүллүүр сүбэтин Дали Окропиридзе салайара ылбычча быһаарыныы буолбатах», — диэтэ Андрей Саввич.
«Сахафильм» дириэктэрэ Алексей Егоров көрөөччү баар буолан саха киинэтэ сайдарын бэлиэтээтэ, кинилэр итэҕэһи-быһаҕаһы чопчу ыйалларын, бэл монтаж хайдах оҥоһуллубутун кытта ырыталларын эттэ. Онон киинэҕэ сөбүлээн сылдьар көрөөччү саҥаттан саҥа бырайыак тупсан иһэригэр айар бөлөҕү кынаттыыр. Кини Туймаада туонатыгар VIII аан дойдутааҕы киинэ бэстибээлэ аһылынна диэн доргуччу биллэрээтин кытта режиссер Василий Слепцов «Сибэкки биэрээри» киинэтин көрдөрдүлэр.
Василий Кривошапкин хаартыскаҕа түһэриитэ.
-
5
-
0
-
0
-
0
-
0
-
0
