Сөмөлүөтүнэн көтөн иһэн түннүгүнэн одуулаатахха, уйаара-кэйээрэ биллибэт ап-араҕас сибэккилээх хонуулар ыраах саҕахха диэри нэлэһийэн көстөллөр. Бу киһи саҕа үрдүктээх рапс диэн үүнээйиттэн Е битэмииннээх арыыны сүүрдэн ылан, косметиканы оҥорорго, кириэмҥэ, мыылаҕа, тиэхиньикэҕэ тутталлар, ынаҕы-сүөһүнү аһаталлар. Рапс ыам ыйыгар сибэккилиир, ап-араҕас хонуу ыраахха диэри унааран халлааны кытта силбэһэр, сиккиэр тыалга муора долгунун курдук долгулдьуйа турар.
Калининград Арассыыйаттан тэйиччи, Европа ортотугар Польшаны, Литваны, Белоруссияны кытта ыаллаһа олорор. Онон бириэмэ Москубаттан биир чаас, Саха Сириттэн 7 чаас хаалан иһэр. Олохтоохтор массыынабытын хатаабаппыт, күрэтэн да туһа суох, мантан таһаарбаттар, кыраныысса эргиччи сабыылаах дэһэллэр.
Сүүһүнэн сыллар тухары халыҥ лабааларынан, кэтит сэбирдэхтэринэн күнтэн хаххалыыр дууп, клен, липа, каштан баараҕай мастар быыстарыгар турар куорат быыла суоҕун Саха Сириттэн кэлбит эрэ киһи бэлиэтии көрөр. Төһө даҕаны массыына, оптуобус аастын, биир да быыла суоҕа дьэ, дьикти.
Москуба уонна Санкт Петербург курдук мөлүйүөнүнэн киһилээх мегаполистары кытта тэҥнээтэххэ, уулуссаҕа тобус-толору дьон кэлиитэ-барыыта, ыксал-тиэтэл суох, олох аргыый наллаан устар, манна Дьокуускайтан эрэ арыый элбэх 488 690 киһи олорор.
Куорат устун сэлэлии үүммүт хоп-хойуу, толуу, баараҕай мастар үрүҥ, кытархай сибэккинэн симэнэн тураллар. Тылла турар от-мас минньигэс сыта дыргыйан, фруктовай чэйи санатар.
Янтарь түмэлигэр сырыттахха, былыргы мастар мөлүйүөнүнэн сыллар тухары кытаатан хаалбыт сымалалара янтардаах тааска кубулуйбут диэн кэпсииллэр. 45-50 мөл. сыл дьапталҕаланан сыппыт күндү таастар мусуой экспоната буолан тураллар.
Сырдык саһархайтан саҕалаан, мүөт, ханьаах курдук, бороҥ, хараҥа кыһыл, от күөҕэ өҥнөөх янтарнай киэргэллэр, шкатулкалар, скульптуралар бары туһунан устуоруйалаахтар. Арассыыйаҕа саамай улахан 4,2 киилэ ыйааһыннаах янтарь таас, Санкт Петербурга Царское село Екатерининскай дыбарыаһын киэргэтэр янтарнай хос сорҕото манна бааллар.
Ааптар хаартыскаҕа түһэриитэ.
-
0
-
0
-
0
-
0
-
0
-
0
