Амалиенау оройуоҥҥа Кенигсберга сэрии иннинэ баай ньиэмэстэр олоро сылдьыбыт виллалара күн бүгүҥҥэ диэри күп-күөх аллеялар быыстарыгар дьэндэһэн тураллар. Бырааттыы Гриммнэр остуоруйаларын санатар дьиэлэр иккилии этээстээхтэр, оһуордаах-мандардаах балкуоннаахтар, мансаардалаахтар, черепица кырыыһалаахтар.
Виллалары атыылаһан ылан, кэммиэрчэскэй хампаанньалар, урбаанньыттар бас билиилэригэр киирбит, оттон сороҕор оҕо уһуйаанын оҥорбуттар. Готическай истииллээх католическай кирха сытыы уһуктаах башнятыгар урут Таҥара сулууспатын ыыталлара, билигин үгүс дьон хаартыскаҕа түһэр кэрэ-бэлиэ сирэ.
Куорат араас уһугар, муостаҕа, башняҕа, мусуой иннигэр остуоруйаттан кэлбит кырачаан хомлиннар скульптураларын оҥорбуттара уратытык көстөр. Күн бүгүн сэттэ хомлиннар бааллар: эбэлэрэ, эһэлэрэ, ийэлэрэ, аҕалара уонна оҕолоро.
Балтийскай муора кытылыгар олорор хомлиннар, атыннык эттэххэ, домовойдар дьоҥҥо көмөлөһөллөр, ол иһин боруонса скульптураны имэрийдэххинэ, баҕа санааҥ туолар диэн этэллэр.
Киһи ытыһын саҕа гномиктар саллайбыт улахан төбөлөөхтөр уонна эльфалар курдук таллаҕар кулгаахтаахтар. Хомлиннар дьиэ кэргэттэрин барыларын буллаххына, ситиһии, табыллыы күүтэр дииллэр, ол бэйэтэ туһунан квест оонньуу курдук.
Аатырбыт Чайковскай «Щелкунчик» балетын бары көрбүт буолуохтааххыт, оттон бу остуоруйаны Кенигсберг куоракка күн сирин көрбүт ньиэмэс суруйааччыта Эрнст Теодор Амадей Гофман суруйбута. Кини олоро сылдьыбыт дьиэтэ билигин Светлогорскайга гостиница буолан турар.
Ону таһынан, Кенигсберга аан дойдуга биллибит философ, учуонай Иммануил Кант олоро сылдьыбыта, кини аатынан Балтийскай федеральнай университет, уруккута Кнайпхоф, куорат киинигэр төгүрүччү уу быыһыгар турар дьоҕус арыы ааттаммыта. Билигин Кант арыытыгар католическай таҥара дьиэтэ, Кафедральнай собор, мусуой баар, онно киирэн органнай классическай муусука кэнсиэрин истиэххэ сөп.
Ааптар хаартыскаҕа түһэриитэ.
-
0
-
0
-
0
-
0
-
0
-
0
