Быйыл бу ааттаах-суоллаах күрэскэ Саха Сириттэн Максим Забровскай кыттан биирдиилээн зачекка бириистээх иккис миэстэни ылан сахалар оту охсууга былыргыттан үтүө үгэстэрдээх, күүстээх охсооччулардаах дойду буоларын өссө төгүл итэҕэттэ. Максим 42 саастаах. Хотуурга эһэтин Иван Васильевич Шишигин кытта сайын окко сылдьыһан сыстыбыт. Кыратыттан, алын кылаастарга үөрэнэр сылларыгар сыһыарбыт. Билигин Максим бэйэтэ предпринимателлиир. Ааспыт сылга дойдутугар Мэҥэ Хаҥаласка улуустааҕы күрэххэ кыайылаах тахсыбыта. Онно улуус баһылыга Дмитрий Тихонов Арассыыйа күрэһигэр кыттарыгар сүбэлээбит.
Оттон күрэскэ эр дьоҥҥо биирдиилээн зачекка Олег Зубков (Свердловскай уобалас) кыайыылааҕынан таҕыста, дьахталларга Наталия Злобина (Кировскай уобалас) бастаата. 65 саастаахтарга+ Александр Молчанов (Пенза уобалаһа), дьахталларга Нина Гальянова (Свердловскай уобалас) кыайдылар.
Артитааҕы собуот былыр-былыргыттан хотууру оҥоруунан аан дойдуга киэҥник биллэр. Урал биир былыргы устуоруйалаах, тимир уустарынан биллэр улахан тэрилтэ. 1753 сыллаахха тэриллэн, хотууру оҥоруунан 1827 сыллаахтан анаан дьарыктанар, тас дойдуларга атыыга таһаарар уонна күрэһи тэрийээччинэн биллэр.
Биллэрин курдук, бу үтүө үгэстэрдээх улахан күрэскэ Саха Сирин хамаандата эриэ-дэхситик бэрт үчүгэйдик кыттар, күүстээх хамаанданы туруорар. Ол курдук, 11 сыл анараа өттүгэр, 2014 сыллаахха бу Артига Мэҥэ Хаҥалас хамаандата бастакы миэстэни ылбыта. Дойду 25 эрэгийиэниттэн 20 хамаанда кыттыбытыттан Мэҥэ Хаҥаластан Вячеслав Окороков бастаабыта, Дмитрий Тихонов иккистээбитэ (эр дьоҥҥо уопсайа 40 күрэсчит кыттыбыта), оттон дьахталларга Сардана Окорокова бочуоттаах үһүс миэстэни ылбыттара!
Бу хамаанда от охсуутун күрэстэригэр аан дойду таһымыгар кыттыыларын салгыыр буоллахха, өссө 2015 балаҕан ыйын 5 күнүгэр Польша Белосток куоратын таһыгар баар Бебжанскай диэн дойду бөдөҥ национальнай пааркатын сиригэр-уотугар илиинэн от охсуутугар норуоттар икки ардыларынааҕы күрэскэ эмиэ кыайыылаах тахсыбыттара. Ол туһунан ити сыл Мэҥэ Хаҥалас “Эркээйи” хаһыата бу курдук суруйбутун билиһиннэриэхпитин сөп: “ Турнирга биһиги биир дойдулаахтарбыт сахалар өбүгэ саҕаттан илдьэ кэлбит дьарыкпытыгар атын омуктартан хаалсыбаппытын ааһан, баһыйар кыахтаахпытын көрдөрдүлэр. Мооруктан төрүттээх Мэлдьэхси олохтооҕо, Аллараа Бэстээххэ биир кэлим диспетчерскэй сулууспа оперативнай дьуһуурунайа Вячеслав Окороков уонна Алтантан төрүттээх Майа олохтооҕо,Муниципальнай баайы-дуолу бас билиигэ агентство салайааччыта Дмитрий Тихонов Саха Сирин эрэ буолбакка, Арассыыйа чиэһин ситиһиилээхтик көмүскээбиттэринэн астынабыт, киэн туттабыт. Кинилэр былырыын Арассыыйаҕа илиинэн от охсуутугар ыытыллыбыт күрэхтэһиигэ кыайыылааҕынан ааттаммыттара. Өрөспүүбүлүкэҕэ от охсуутугар сыллата ыытыллар „Куулэй“ күрэхтэһиилэрин сэҥээрэр, кэтээн көрөр дьон Саха Сиригэр бастыҥ охсооччулар буолалларын бэркэ билэллэр. Польшаҕа ыытыллыбыт күрэхтэһиигэ Арассыыйа аатыттан соҕотох хамаанда туруоран биһиги биир дойдулаахтарбыт 32 хамаанда күрэхтэспититтэн бириистээх иккис миэстэни ылары ситистилэр. Манна Канада, Чехия, Германия, Словакия, Венгрия, Беларусь уонна Польша дойдуларыттан хамаандалар күрэхтэстилэр. Бэрт эрийсиилээх күрэхтэһии түмүгүнэн хаһаайыттар – поляктар бастаатылар. Спорка сыһыаннаан этэллэригэр дылы, кинилэргэ „төрөөбүт истиэнэлэрэ“ да көмөлөстөҕө. Биһиги уолаттарбыт үс хамаанданы туруорбут күүстээх белорустары баһыйбыттара кинилэр чахчы да кыахтаахтык киирсибиттэрин туоһулуур. Кыттааччы хамаандалар бэрэстэбиитэллэригэр зачету таһынан 25 миэтэрэҕэ туспа күрэхтэһии ыыппыттара сэҥээриини ылла. Барыта 30 киһи илин-кэлин түһүстүлэр. Онно биһиги хамаандабыт бэрэстэбиитэлэ, биир дойдулаахпыт, Ил Түмэн дьокутаата Александр Романов кыайыылаах тахсан, уолаттарбыт ситиһиилэрин өссө чиҥэтэн биэрэн, сахалар илиинэн от охсуутугар бастыҥмытын итэҕэттэ".
Хаартыска телеграм ханаалтан уонна «Эркээйи» хаһыаттан
-
4
-
0
-
0
-
0
-
0
-
0
