Тэрээһиҥҥэ Ил Түмэн тутууга, дьиэҕэ-уокка уонна хомунаалынай хаһаайыстыбаҕа, энергетикаҕа сис кэмитиэтин бэрэссэдээтэлэ Александр Корякин эҕэрдэ тылы эттэ уонна Нерюнгри оройуонун олохтоохторугар Ил Түмэн наҕараадатын туттартаата.
«Олоҥхо ыһыаҕын тэрийэргэ Нерюнгри оройуонун ылбычча талбатахтара. Бу кэмҥэ хас даҕаны бэлиэ бырааһынньык бэлиэтэнэр: Гавриил Чиряев төрөөбүтэ 100 сылын туолар, Нерюнгри куорат тэриллибитэ үйэ аҥаардаах үбүлүөйэ уонна Аҕа дойдуну көмүскүүр сэриигэ Улуу Кыайыы 80 сылын бэлиэтиибит. Бу суолталаах тэрээһиннэр тэрийээччилэргэ бүк эппиэтинэһи сүктэрэллэр уонна устуоруйа нэһилиэстибэтигэр биһиги бары кыттыгастаахпытын бэлиэтиибит.
Олоҥхо ыһыаҕар алгыс түһэр кэмигэр халлаан ырааһыра түһэн, күн тахсан сардаҥаларынан сырдатта, бу үтүө бэлиэ, инникэгэ эрэл, барыбытыгар күүһү-уоҕу биэрэр. Саха Сирин сайдыытыгар Гавриил Чиряев дьоһун кылаатын киллэрбитэ. Кини Бүлүүгэ күн сирин көрбүтэ, муударай стратегиятынан уонна ырааҕы өтө көрөрүнэн өрөспүүбүлүкэни сайыннарбыта.
Судаарыстыбаннай диэйэтэл туһунан өлбөөдүйбэт өйдөбүлү хаалларарга өссө да элбэҕи оҥоруохха наада. Оройуон баһылыга Чиряев 100 сылыгар киэҥ далааһыннаах тэрээһиннэр буолалларын туһунан билиһиннэрдэ. Бүлүү сирэ-дойдута талааннаах дьонунан баай, кинилэртэн биирдэстэрэ Гавриил Чиряев Саха Сирин соҕуруу, арҕаа эҥээригэр бырамыысыланнас сайдыытыгар дьоһун кылаатын киллэрбитэ. Кини көҕүлээһининэн, туруорсуутунан, өрөспүүбүлүкэ сайдыытыгар үгүс ситиһиилээх олук оҥоһуллубута», — санаатын үллэһиннэ Александр Корякин.
Ил Түмэн пресс-сулууспата
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
