Билигин эмсэҕэлээбит нэһилиэктэргэ үгүстэригэр уу таһыма түһэн, чөлүгэр түһэрэр үлэлэр саҕаланнылар, олохтоохторго тустаах көмө оҥоһуллар. Өрөспүүбүлүкэ араас улуустарыттан Тымныы полюһугар биригээдэлэр хомуллан уонна волонтердар көмөлөһө кэлэллэрэ былааннанар. Ити курдук олох оннугар түһэн эрэр. Билигин хоромньуну ааҕыы үлэтэ саҕаланна.
Өймөкөөн куустатыгар кэлбит гуманитарнай көмөнү үллэрии туһунан Томтордооҕу кыраайы үөрэтэр түмэл салайааччыта Айталина Иванова маннык кэпсээтэ:
— Томтордооҕу түмэл дьиэтигэр гуманитарнай көмөнү тутабыт, мунньабыт. Дьокуускайтан массыыналар кэлитэлээн эрэллэр. Олохтоох таксист уолаттарбыт бу дьыалаттан туора турбакка, биир дойдулаахтарыгар көмөлөһүүгэ бэйэлэрин кылааттарын киллэрэллэр. Олохтоох дьонтон эмиэ кыралаан да буоллар көмө киирэр. Улуус урбаанньыттара, тэрилтэлэр кыахтарынан көмө оҥороллор.
Түмэлбитигэр кэлбит көмөнү наардыыр пуун тэрийдибит. Хас биирдии кэлбит мал-сал, ас-таҥас испииһэккэ киллэриллэр. Ким, хаһан, төһө көмөнү оҥорбута барыта бэлиэтэнэр.
Онтон бу ас-таҥас, тэрил арааһа барыта үллэриллэн, сааһыланан, ууттан эмсэҕэлээбит нэһилиэктэргэ ыытыллар.
Бары бииргэ буоллахпытына барытын кыайыахпыт диэн санаа Өймөкөөн дьонун-сэргэтин биир сомоҕо оҥорор.
Хаартыска "Хотугу сардаҥа" хаһыат саайтыттан
-
0
-
1
-
0
-
0
-
0
-
0
