Уопсастыба

Ааҕааччы суругар олоҕуран, Роспотребнадзор Саха Сиринээҕи салаатыгар официальнай сурук ыыттыбыт, бу түгэни быһааран биэрэллэригэр көрдөстүбүт.

Өр кэтэһиннэрбэккэ биир-икки күнүнэн харда сурук тигинээн кэллэ. Роспотребнадзор иһитиннэрэринэн, бахчевай култуура аһын атыылыырга, ону сөпкө харайарга атыы-эргиэн эбийиэктэригэр уонна ырыынактарга СП 2.3.6.3668-20 нүөмэрдээх санитарнай-эпидемиологическай ирдэбил баар эбит. Санатан эттэххэ, бахчевай култуураҕа арбуз, дыня, тыква, кабачки киирэллэр.

Ол быраабыла «з» чааһыгар, 8.11 пуунугар сурулларынан, нэһилиэнньэҕэ бахчевай култуураны быһан баран, өлүүлээн атыылыыр бобуллар. Маны таһынан, арбууһу, дыняны сиргэ уура сытан атыылыыр эмиэ көҥүллэммэт.

Итиниэхэ олоҕуран, Роспотребнадзор булгуччу толоруллуохтаах быраабыланы кэһиини бопсорго «Сайсары» (Бааһынай ырыынак) аадырыһыгар олохтоммут сокуону кэһэр табыллыбатын, атыы-эргиэн ирдэбилин тутуһар наадалааҕын туһунан сэрэтиини ыыппыт.

Ол эрэн ырыынакка быһыллыбыт арбуустар син биир кэчигирэһэ сыталлар, атыыһыттартан ыйыттахха, иһэ хайдаҕын, төһө буспутун көрдөрөөрү быһабыт дэһэллэр. Арбуз киилэтэ 85 солк., дыня 130-150 солк. Биир орто арбуз 650-800 солк. буолар.

Санитарнай-эпидемиологическай ирдэбили оҕуруот аһын, фруктаны эрэ атыылыыр кэлии дьон кэһэллэр, онон бары буруй-сэмэ кинилэр үрдүлэринэн барар диэн буолбатах. Ырыынакка, маҕаһыыҥҥа да сырыттахха, хаһан оҥоһуллубута биллибэт иэдьэгэйи салапаан бакыакка уган атыылыыллар. Ыйыттахха: «Бүгүн аҕалбыттара, сибиэһэй», — диэн буолар. Сороҕор ол астара аҕырбыт, мөкү сыттаммыт буолааччы.

Роспотребнадзор быһааран биэрэринэн, розничнай атыы-эргиэн быраабылатын 2463 №-дээх 3 пуунугар ыйылларынан, ону таһынан, РФ Бырабыыталыстыбата сорох аакталарга уларытыылары киллэрбитигэр сигэнэн, атыыһыт атыылыыр аһыгар-үөлүгэр, бородууксуйатыгар сыанатын, киилэтин, төһө ыйааһыннааҕын барытын ырылыччы суруйуохтаах.

Оттон кууһунан кэлбит бородууксуйаны аһан баран, атыыһыт бэйэтэ кыра бакыаттарга (дьоҕус пластик иһиттэргэ) суулаан, үллэрэн атыылыыр түгэнигэр бородууксуйа хаһан оҥоһуллубутун, харайыллар болдьоҕун, усулуобуйатын, оҥорон таһаарааччы аадырыһын, аска-үөлгэ туох компоненнар, ол иһигэр генно-модифицированнай эттиктэр баалларын-суохтарын чопчу ыйыахтаах. Таможеннай сойуус чилиэннэрэ бородууксуйа биир кэлим бэлиэтин туруоруохтаахтар.

Соторутааҕыта «Скиф» маҕаһыыныттан тоҥоруллубут куурусса кынатын атыыластым, бэйэлэрэ араартаан, суулаан атыылыыллар. Дьиэбэр аҕалан ириэрэн, буһараары гыммытым арай сытыйбыт, буортуйбут сыт саба биэрдэ. Сонно тута төттөрү илдьэн биэрбиппэр харчыбын төнүннэрдилэр.

Оптовайга, дьиэ таһынааҕы даҕаны маҕаһыыннарга бичиэнньэ, баахыла арааһын атыылыыллар, ыйааһыннаан бэйэлэрэ бакыат иһигэр угаллар уонна хаһан оҥоһуллубутун, харайыллар болдьоҕун хаһан даҕаны суруйбаттар. Кэмпиэти, сакалааты киилэнэн, гыраамынан үллэрэн атыылыылларыгар эмиэ хаһааҥҥы диэри харайыллар болдьоҕо көстүбэт. Баҕар, олох даҕаны болдьоҕо тахсыбыты атыылыыллара буолуо.  

Халбаһыны, сыыры эмиэ быһан атыылыыллар, ол астара хаһан оҥоһуллубутун, харайыллар болдьоҕун ким да билбэт. Онон ити аҥаардастыы оҕуруот аһын, фруктаны атыылыыр кэлии дьоҥҥо саба түһэр сыыһа дии саныыбын. Куруук атыылаһар киһи фрукта, оҕурсу-помудуор эргэтин-саҥатын хараҕынан көрөн, тутан-хабан билэр. Оттон бакыат иһигэр атыыланар иэдьэгэй, быһыллыбыт халбаһы, сыыр төһө сибиэһэйин таайаргар эрэ тиийэҕин. Сорох сыыры дьиэҕэр аҕалан быспытыҥ онон-манан маҥхайан, түүнүгүрэн эрэр буолааччы.

Арбууһу-дыняны быһан баран атыылыыр бобуллар түгэнигэр халбаһыны-сыыры бысталаан, хаһан оҥоһуллубутун суруйбакка эрэ атыылыыр төһө сөп эбитэ буолла. Роспотребнадзор суругун аахтахха, атыы-эргиэн быраабылатын быһыытынан оннук көҥүллэммэт.  

Атыы-эргиэн эбийиэктэрин үҥсүү сурук киириэн иннинэ бэрэбиэркэлиир бырааптара суох, онон өскөтүн быһыллыбыт арбууһу, хаһан оҥоһуллубута биллибэт, харайыллар болдьоҕо суох үрүҥ аһы, ыйааһыннаах бичиэнньэни, халбаһыны, сыыры, о.д.а. аһы атыыластаххытына, ону хаартыскаҕа түһэрэн, Роспотребнадзорга ыыттаххытына биирдэ миэрэ ылыахтарын сөп.

Ааптар хаартыскаҕа түһэриитэ.