Манна даҕатан эттэххэ, сиппит минньигэс арбууһу таларга тоҥсуйан көрдөххө, лыҥкынас тыастаах, бүтэй тыастааҕы ситэ илигинэ устубуттар. Арбууһу илиигэр ылан ойоҕоско охсон көрдөххүнэ сиппит буоллаҕына илииҥ тэйэр, оттон ситэ илик сымнаҕас.
Бахча буолатыгар күн сылаас сардаҥаларыгар сытан буспут арбуз хараҥа от күөҕэ өҥнөөх, сиргэ сыппыт сирэ араҕас, өскөтүн күн тиийбэтэҕинэ сырдык, маҥан бээтинэ хаалар. Хаҕын тыҥыраххын кыайан алдьаппаккын, оттон эрдэ хомуйуллубут түгэнигэр өҥө сырдык уонна хаҕа сымнаҕас буолар. Быһыллыбыт арбууһу ылар сэрэхтээх, атыыһыт быһаҕа төһө ырааһын билбэккит, итиигэ микроптар, бактериялар түргэнник тарҕаналлар, онон түргэнник буортуйар. Оннук арбууһу сиэбит дьон истэрэ ыалдьыан сөп. Өскөтүн арбууһу быстаххына, иһэ сымнаан хаалбыт түгэнигэр аһыйан, буортуйан эрэр сибикитэ, манныгы сиир сэрэхтээх.
Сорох дьон төгүрүк арбуз ньолбуһахтан ордук минньигэс дииллэр даҕаны, кээмэйиттэн эмиэ тутулуктаах, ортоттон арыый улахан арбуз 6-9 киилэлээх ордук минньигэс буолар. Ол эрэн аһары улаханы химикаттарынан аһатан улаатыннарбыт буолуохтарын сөп. Маны таһынан, ууга уктахха, ситэ илик тимирэр, оттон сиппит дагдайан тахсар диэн этэллэр.
Аан дойду үрдүнэн арбуз араас суордун олордоллор, онон иһэ кыһыл, араҕас, маҥан буолуон сөп. Итиигэ арбуз киһи утаҕын үчүгэйдик ханнарар, ону таһынан магнийынан, фолиевай кислотанан баай эбит. Магний ньиэрбэҕин уоскутар, калий, натрий, кальций иҥэригэр көмөлөһөр, иммунитеккын көтөҕөр, тымырдарыҥ устун хааныҥ сүүрэригэр туһалаах.
Ааптар хаартыскаҕа түһэриитэ.
-
0
-
0
-
0
-
0
-
0
-
0
