Федеральнай биэдэмистибэ салайааччыта Саха Сиринээҕи ИДьМ үлэтин үрдүктүк сыаналаата. Өрөспүүбүлүкэ силиэстийэлэммит буруйу оҥоруу үүнүүтүн тэтиминэн бастыҥ уон эрэгийиэн ахсааныгар киирбит.
Буруйу арыйыы уопсай көрдөрүүтэ 57,8% тэҥнэһэн, Уһук Илиҥҥэ уонна Арассыыйаҕа орто көрдөрүүттэн үрдүк.
Көрсүһүүгэ информационнай-коммуникационнай технологиялары туһанан оҥоһуллар буруйдары утары охсуһууга бииргэ үлэлээһин боппуруостара дьүүллэстилэр. Ону таһынан, өрөспүүбүлүкэ суолларыгар суол-тырааныспар быһылааннарын ахсаанын аҕыйатыыга болҕомто уурулунна.
Эрэгийиэҥҥэ буруйу оҥоруу ахсаана 0,7% аҕыйаабыт. Владимир Колокольцев Ил Дархаҥҥа ыкса сибээстээх үлэтин иһин махтанан, «Саха Өрөспүүбүлүкэтигэр быраабы кэһиини сэрэтии» бырагыраама чэрчитинэн эрэгийиэн бүддьүөтүн суотугар атыылаһыллыбыт миграция уонна суолга куттал суох буолуутун хайысхаларынан судаарыстыбаннай өҥөнү оҥорор Сомоҕо киини үрдүктүк сыаналаата.
Билигин бу бырагырааманан Нерюнгри оройуонун Иенгра сэлиэнньэтигэр полиция поһа тутуллар. Билиҥҥи туругунан Өлөөн сэлиэнньэтигэр биир модульнай дьаһалта дьиэтэ тиэрдиллиэҕэ.
Айсен Николаев өрөспүүбүлүкэ былаастара быраабы араҥаччылааһын боппуруостарыгар улахан болҕомтону ууралларын бэлиэтээтэ уонна биэдэмистибэ таһаарыылаахтык үлэлииригэр усулуобуйаны тэрийиигэ инникитин да көмөлөһөр
ххх
Салгыы бу күн миниистир Дьокуускайга өрөспүүбүлүкэтээҕи ИДьМ Судаарыстыбаннай өҥөнү оҥорор киинигэр сырытта.
Владимир Колокольцев тэрилтэ сүрүн үлэтин хайысхаларынан салаалар салайааччыларын дакылааттарын иһиттэ. Санаттахха, Киин дьиэтэ эрэгийиэн бүддьүөтүн суотугар атыылаһыллыбыта. Манна миграция боппуруостарыгар уонна Судаарыстыбаннай автоинспекция (ГАИ) салаалара киирэллэр.
Бу кииҥҥэ пааспар, суоппар дастабырыанньатын ылыахха, тырааныспары учуокка туруоруохха уонна да атын өҥөлөрүнэн туһаныахха сөп. Ону таһынан, тырааныспары ыытар быраапка эксээмэн туталлар.
ИДьМ миниистирэ судаарыстыбаннай өҥө хаачыстыбатын уонна түргэн-тарҕан буолуутун үрдэтиигэ, ону тэҥэ каадырдары бэлэмнээһиҥҥэ сүрүн соруктарга болҕомтотун уурда.
«Судаарыстыбаннай өҥөнү оҥорор киин сүрүн соруга – уочарат суох буолуута. Дьон судаарыстыбаннай өҥөнөн туһанаары кэлэн, Киин үлэтигэр үҥсүүтэ-харсыыта суох ылыахтаахтар», – диэн Арассыыйа ИДьМ баһылыга бэлиэтээтэ. Салайааччылар ону таһынан Саха сиринээҕи ГАИ устуоруйатын түмэлигэр сырыттылар. Владимир Колокольцев түмэл экспозициятын кытта болҕойон билсэн баран, 1951 сылтан ГАИ-ҕа 30-тан тахса сыл үлэлээбит автоинспектор Дмитрий Николаевич Алексеевка Дьокуускайга пааматынньыгы туруоруу көҕүлээһинин өйөөтө.
Түмэлгэ миниистир улахан интэриэһин ГАИ үлэһиттэрэ – байыаннай дьайыы кыттыылаахтара бэлэхтээбит эспэнээттэрэ тарта. Киниэхэ байыастар тэриллэрин, хаартыскаларын уонна трофейдарын көрдөрдүлэр.
Оробуочай сырыытын кэмигэр Владимир Колокольцев Элбэх өҥөнү оҥорор миграция киинигэр уонна Омук дьонун социальнай уонна култуурунай адаптациятын киинигэр сылдьан, тэрилтэлэр матырыйаалынай-тиэхиньиичэскэй баазаларын уонна үлэлэрин тэриллиитин кытта билистэ.
Киин үлэ миграциятын хайысхатынан судаарыстыбаннай өҥөлөрү оҥорор, ол иһигэр омук дьоно уонна кырасдааныстыбата суох дьон РФ сиригэр-уотугар үлэлиир кыахтарын туһугар патены оҥорор уонна биэрэр.
ИДьМ миниистирэ Владимир Колокольцев омук дьонун кытта тиһиктээх уонна кэлимсэ үлэни хааччыйар сыалтан атын быраабы араҥаччылыыр биэдэмистибэлэри уонна Арассыыйа национальностар дьыалаларыгар Федеральнай ааҕыныстыбатын кытта бииргэ үлэлээһини тэрийиигэ хас да сорудаҕы биэрдэ.
Ону кытта тэриллии үрдүк таһымын, аныгылыы хааччыллыытын уонна сылдьааччыларга табыгастаах усулуобуйаны бэлиэтээтэ уонна маннык кииннэр биһиги кыраасданнарбытыгар судаарыстыбаннай өҥө хаачыстыбатын уонна тиийимтиэтин биллэ үрдэтэллэрин эттэ.
Хаартыскалар Андрей Сорокин, Мария Васильева, ЯСИА
-
0
-
0
-
0
-
0
-
0
-
0
