V Бүтүн Арассыыйатааҕы кэмпириэнсийэҕэ норуот көҕүлээһининэн бүддьүөтү таҥарга бастыҥ үлэлээх үс субъект бэлиэтэммитэ, ол иһигэр биһиги өрөспүүбүлүкэбит хайҕаммыта. РФ Үпкэ министиэристибэтэ Ил Дархан Айсен Николаевка махтал суругу туттарбыта. Онон Арассыыйа, аан дойду таһымыгар Саха Сирэ нэһилиэнньэ көҕүлээһининэн уопсастыбаннай инфраструктураны тупсарар бырайыактары кыттыгас үбүлүүр ППМИ бырагырааманы сэргээн тураллар. Сыл ахсын ыытыллар куонкуруска өрөспүүбүлүкэ көхтөөхтүк кыттар, олоххо киирбит бырайыактарын билиһиннэрэр.
Ааспыт сыллары санаан аастахха, 2019 с. Майаҕа оптуобус тохтобулун оҥорор бырайыак «Уопсастыбаннас кыттыыта» түһүмэххэ кыайан, икки оптуобуска аҕыс тохтобул оҥоһуллубута. 2020 с. «Уопсастыбаннай партнерство» түһүмэххэ «Экоквантум» бырайыак кыайан, Чурапчы улууһун Соловьев нэһилиэгин уһуйааныгар аныгы көмпүүтэр, оонньуур тэрил туруоруллубута. 2021 с. «Уопсастыбаннас кыттыыта» түһүмэххэ Чурапчытааҕы «Айылгы» норуот айымньытын дьиэтин өрөмүөнэ иккис миэстэни ылбыта. 2024 с. «Уопсастыбаннай партнерство» түһүмэххэ Дьокуускай к. Оҕо айымньытын дыбарыаһын уос номоҕор киирбит баһаатайа, дириэктэрэ Фаина Авдеева төрөөбүтэ 100 сылыгар скульптурнай композиция бырайыага үһүс миэстэни ылбыта.
Быйыл «Үп-харчы култууратын киин куората» диэн Бүтүн Арассыыйатааҕы куонкурус финалыгар Саха Сирэ таҕыста. Маннык куонкуруһу РФ Бырабыыталыстыбата нэһилиэнньэ үп-харчы эйгэтигэр киэҥ билиилээх буоларын хааччыйарга сыллата тэрийэр.
Хаартыска: Светлана Колодезникова архыыбыттан.
-
0
-
0
-
0
-
0
-
0
-
0
